Rói og liðfelagarnir í HØJ mistu seinasta uppflytingarmøguleikan

Tvey føroyingalið í næstbestu donsku hondbóltsdeildini spældu í dag, og bæði liðini taptu sínar dystir. 

Rói Berg Hansen og liðfelagarnir í HØJ mistu seinasta uppflytingarmøguleikan tá teir á útivølli taptu 27-30 fyri Team Sydhavsøerne.

Í fyrra hálvleiki gekk sum eftir ánni hjá HØJ, ið var á odda 18-13, men í seinna hálvleiki steðgaði fullkomuliga upp hjá HØJ sum tapti seinna hálvleik 9-17. 

Rói Berg Hansen skoraði tvey mál fyri HØJ í dag. Komandi leygardag spælir HØJ seinasta dystin á heimavølli hetta kappingarárið. Tá kemur Skive á vitjan. 

HØJ hevur fýra stig upp til Ajax Keypmannahavn, ið er á triðja plássinum við 35 stigum. Bæði liðini hava bara ein dyst eftir, og kann HØJ tí ikki longur røkka triðja plássinum, ið gevur upp- og niðurflytingardystir móti einum liði úr bestu deildini. 

Teis Horn Rasmussen og liðfelagarnir í Tønder taptu í dag fimta dystin á rað. Í dag tapti Tønder á heimavølli 27-28 fyri Vendsyssel. Tað var serliga í fyrra hálvleiki, at illa gekk í hond. Í steðginum var Vendsyssel á odda 16-12. 

Teis Horn Rasmussen skoraði eitt mál fyri Tønder í dag. Eingin kapping er í triðbestu deildini og í teimum lægru deildunum, og tí verður eingin niðurflyting úr næstbestu deildini, so Teis og liðfelagarnir sleppa undan at spæla upp- og niðurflytingardystir. 

Komandi leygardag endar Tønder kappingarárið á útivølli móti Odense, ið liggur næstaftast í deildini.

Í morgin klokkan 14 kunnu Rókur Akralíð og liðfelagarnir í HEI Skæring syrgja fyri, at Brandur Halgirsson og liðfelagarnir í Ajax tryggja sær triðja plássið. Tá kemur HC Midtjylland á vitjan. Um HEI Skæring vinnur er Midtjylland úti av kappingini um triðja plássið. 

Støðan: