Føroyski landsliðsbakkurin, Rógvi Baldvinsson og liðfelagarnir í Bryne eru bara nummar seks í bólki 2 í triðbestu norsku fótbóltsdeildini, men í norsku steypakappingini gera teir veruliga vart við seg.
Fyrr í ár hava Rógvi Baldvinsson og liðfelagarnir sent tvey lið úr næstbestu norsku deildini úr steypakappingini. Fyrst Viking Stavanger og síðani Sandnes, ið er liðið Ára Mohr Jónsson.
Í kvøld sendi Bryne aftur út eitt lið úr næstbestu fótbóltsdeildini úr steypakappingini.
Bryne spældi á útivølli ímóti Ullsaker/Kisa. Aftaná longda leiktíð var støðan framvegis javnleikur 0-0, og tí var neyðugt við brotssparkskapping.
Í brotssparkskappingini brendi heimaliðið tvey brotsspørk meðan Bryne bert brendi eitt. Millum málskjúttarnar hjá Bryne í brotssparkskappingini var Pål Fjelde, ið spældi nakrar dystir fyri 07 Vestur í fjør.
Rógvi Baldvinsson fekk eitt gult kort í longdu leiktíðini. Millum liðini Bryne kann møta í fjórðingsfinaluni er Rosenborg.
