Sveinur Gaard Olsen tók bæði dómararnar, áhoyrararnar í studio og sjónvarpshyggjararnar á bóli, tá han fríggjakvøldið sang Blue Monday hjá New Order. Tískil hava tey flestu stórar vónir til hansara upptraðkan komandi fríggjakvøld, tá temaðið verður "mashup". Men møguliga fer Sveinur als ikki at kunna syngja fríggjakvøldið.
Tað hevur tikið hart upp á røddina hjá Sveini, at hann hevur verið forkølaður og samstundis hevur vant og sungið í samband við X-Factor. Hetta merkti eisini, at hann ikki sang til aðalroyndina fríggjadagin, soleiðis at hann kundi geva røddini hvíld áðrenn live-showið. Um vikuskiftið hevur hann veruliga hvílt røddina, tí hann hevði fingið forboð fyri at brúka røddina. Allíkavæl stendur ikki væl til við røddini hjá havnarmanninum.
- Í dag er Sveinur hjá einum hálslækna, har hann fær eitt lítið myndatól gjøgnum nøsina og niður í hálsin. Sveinur var fyrst hjá einum lækna, men hann dugdi ikki at síggja nakað, so nú royna vit, um myndatólið kann avdúka okkurt í hálsinum, greiðir dómarin og vegleiðarin hjá Sveini, Cutfather, frá. Sambært honum hevur trupulleikin við røddini eisini fingið Svein at leggja av at roykja.
Í løtuni er ikki nógv annað at gera, enn at krossa fingrar fyri, at røddin hjá Sveini verður klár komandi fríggjakvøld, tí hann og Cutfather ætla enn einaferð at taka hyggjararnar á bóli.
- Tá mann veit, hvaðani Sveinur er, so rokni eg við, at tey flestu verða bilsin av hansara sangvali. Kanska ikki júst eitt løgið val av sangi, men eg vænti bara ikki, at nakar nakrantíð hevði gitt, at hann fór at syngja tað lagið, sigur Cutfather.
Fjóðra live-showið verður fríggjakvøldið klokkan 19 føroyska tíð á DR1.
