Mark Hughes er ikki longur venjari hjá Queens Park Rangers. Tað tykist púra greitt sambært millum annað BBC, at Harry Redknapp verður nýggjur venjari.
QPR hevur framvegis ikki vunnið í Premier League hetta kappingarárið, og tað kostaði í dag fyrrverandi venjaranum hjá Gunnari Nielsen, Mark Hughes, starvið.
BBC hevur saman við fleiri øðrum miðlum Harry Redknapp sum favoritt at taka yvir á Loftus Road. Um vikuskiftið verða tað Mark Bowen og Eddie Niedzwiecki, sum standa á odda fyri liðnum, sum skal spæla móti Manchester United á Old Trafford.
QPR liggur niðast í Premier League við bara fýra stigum fyri 12 dystir. Mark Hughes hevur í tveimum førum verið venjari hjá føroyska landsliðsmálmanninum, Gunnar Nielsen. Fyrst í Blackburn og síðani í Manchester City.
