Sambært russiska uttanríkisráðharranum, Sergej Lavrov, útilokar forseti landsins, Vladimir Putin, samráðingar við Ukraina eftir ukrainska átakið í Kursk-landslutinum.
- Vladimir Putin hevur sagt tað ógvuliga týðiliga, at eftir átakið í Kursk eru allar samrøður við Ukraina ómøguligar, sigur Sergej Lavrov.
Hetta sigur uttanríkisráðharrin við russiskt ríkissjónvarp, nú russiski forsetin vitjar í Aserbadjan, og tað er norska kringvarpið - NRK - sum endurgevur.
Tað verður ein vika í morgin, síðan ukrainskar herdeildir tóku russiska forsetan á bóli og tóku seg inn í russiska Kursk-landslutin.
Her hevur Ukraina tikið fleiri russiskar bygdir og smærri býir.
Í Kursk-landslutinum roynir ukrainski herurin at oyðileggja veitingarfarleiðirnar hjá russiska herinum til krígsførsluna í Ukraina.
Sambært ukrainskum hernaðarmyndugleikum hevur russiski herurin skotið eitt ótal av rakettum úr russiska Kursk-landslutinum og inn í Ukraina.
