Stutt eftir klokkan hálvgum tólv í dag vóru russisku forsætisráðharrahjúnini, Ludmilla og Vladimir Putin, í einum valhøli stutt uttan fyri Moskva og sett kross fyri, hvønn tey vilja hava at vinna forsetavalið í dag.
Nógv tíðindafólk og starvsfólk hjá valmyndugleikunum vóru inni í valhølinum, og tað fór eitt suð ígjøgnum fjøldina, tá Vladimir Putin brádliga misti atkvøðuseðilin, júst sum hann var á veg til at koyra seðilin í atkvøðukassan. Putin bar skjótt at og tók atkvøðuseðilin upp, áðrenn nakar fekk stundir til at síggja, hvar hann hevði sett krossin.
Tíðindafólk siga, at Putin var í góðum hýri og sá ikki út til at stúra fyri valúrslitinum, Men tað nýtist honum kanska heldur ikki, tí sambært meiningakanningunum fær hann umleið 60 prosent av atkvøðunum og vinnur sostatt longu í fyrra umfari.
