Kringvarpið noktar at upplýsa, hvussu stórur partur av køkuni fellir til sp/f Progress, tá sponsoravtalur verða gjørdar.
Kringvarp Føroya hevur givið einum privatum smápartafelag loyvi at selja sponsoravtalur um allar sendingar hjá almenna stovninum.
Talan er um nýstovnað felag, sp/f Progress við Havgrími Johannsen, sum hevur fingið í lag avtaluna, ið gevur smápartafelagnum heimild at selja vegna Kringvarpið.
Í sáttmálanum verður útgreinað, at "sp/f Progress fær loyvi til at selja sponsoravtalur vegna KvF av øllum sendingum og øðrum sponsorumráðum hjá KvF."
Sambært sáttmálanum verður sp/f Progress provisiónslønt fyri sítt arbeiði. Hetta verður vanliga gjørt fyri at eggja sølufólki til at selja so nógv sum yvirhøvur tilber.
Men ikki ber til at fáa upplýst og útgreinað provisiónina.
- Vit halda, at talan er um fíggjarlig viðurskifti hjá einstaklingum, tá Kringvarp Føroya letur provisión fyri at útvega stovninum inntøkur, og vit halda somuleiðis, at tað hevur stóran fíggjarligan týdning fyri tann persónin ella virkið, sum upplýsingin viðvíkur.
Soleiðis ljóðar svarið úr Kringvarpinum, tá Miðlahúsið biður um innlit í málið.
Harvið verður almenninginum noktað innlit í, hvussu stórur partur av køkuni fer til privata smápartafelagið, tá sponsorat verða seld til tær sendingar, sum Kringvarpið síðani ætlar at framleiða.
