Norski áleyparin hjá KÍ hetta kappingarárið, Ole Erik Midtskogen, hevur skift til írska Dundalk. Tað var júst Dundalk, sum sendi KÍ úr Europa League kappingini í ár.
Tað hevur leingi ljóðað, at Ole Erik Midtskogen ikki heldur fram í KÍ. Hann hevur verið ein týðandi spælari í álopsspælinum, sjálvt um málini bara blivu til 10 í teimum 30 dystum hann spældi við KÍ. Eitt av teimum málunum kom móti júst Dundalk, tá KÍ tapti 3-1 í avgerandi dystinum undan bólkaspælinum í Europa League.
Á heimasíðuni hjá Dundalk verður sagt, at hann er ein stórur og sterkur áleypari, sum eisini skoraði eitt avbera gott mál móti teimum. Tað verður lagt afturat, at Ole Erik Midtskogen væntandi kemur at passa væl inn í spælistílin hjá Dundalk.
Umframt Ole Erik Midtskogen, so hava David Skrbec, Lukasz Jarosinski, Steinbjørn Olsen og Ólavur Niclassen takkað fyri seg í KÍ á hesum sinni, meðan Árni Frederiksberg og Mathias Rosenørn eru nýggir í hópinum.
