Eilif Samuelsen viðger í lesarabrævi røðuna, sum undirritaði helt á aðalfundinum hjá Føroya Lærarafelag.
Í stuttum, so roynir Eilif at skúgva kjarnuna í røðu míni til viks. Hann fer aftur á gamla lagið um, at vit (altso sambandsflokkurin) gjørdu tað og tað, men tit hava bara elvt til rok, síðani tit tóku við.
Veruleikin er tann, at vit hava brúkt nærum 5 ár at rudda upp í tí vánaligu fyrireikingini, sum Eilif Samuelsen og hansara samgonga gjørdi, tá tey samtyktu nýggju fólkaskúlalógina.
Lógir og karmar hanga saman
Víst inniheldur nýggja fólkaskúlalógin nógv gott og hon var eitt stórt framstig. Og víst verður nógv ótrúliga gott arbeiði gjørt á skúlunum við nýggju lógini.
Men hon var alt ov illa viðgjørd og ov illa umhugsað politiskt, áðrenn hon varð sett í verk. Við tí úrsliti, at tað positiva, sum átti at verið grundarlagið undir okkara fólkaskúla, endaði alment í einum longum víggi um pening, játtanir, niðurskurðir og uppgávur hjá lærarunum, heldur enn í orðaskifti um at seta nýskapan í verk og geva skúlunum rúmd og ábyrgd.
Tí hava vit nýtt so stóra orku til at viðgera og skapa karmar um tann góða fólkaskúlan eftir arbeiðið hjá Eilifi, har hann ikki útvegaði fólkaskúlanum neyðugar karmar at fremja tann góða skúlan.
Alt er gjørt seinni
Eilif nevnir tildømis skúlastýrini. Ja, tey setti Signar á Brúnni í verk, meðan hann sat sum landsstýrismaður.
Vit hava lagt ætlanir og brúkt øgiliga orku uppá at fáa sett í verk møguleikarnar í nýggju fólkaskúlaógini - onki varð fyrireikað frá undanfarnu samgongu.
Og vit hava hækkað játtanina til fólkaskúlan við 50 prosentum, síðani Eilif Samuelsen sat. Men vit mugu sjálvandi spyrja, um vit fáa nóg nógv gott burturúr?
Annlis Bjarkhamar hevur sett sjøtul á eitt gott og veruligt arbeiði saman við skúlunum um, hvussu vit fáa trivnaðin og tann góða fólkaskúlan á skránna. Og hetta arbeiðið skal nú fylgjast upp.
Tað var høvuðsboðskapurin í míni røðu.
Fakfeløg eru meira enn limatreytir
Tá Eilif Samuelsen sigur, at eitt fakfelag bara skal takast við lønar- og sáttmálaviðurskifti hjá sínum limum, so eri eg beinleiðis ósamdur. Eitt fakfelag er nogv meira enn tað. Tað haldi eg eisini, at Føroya Lærarafelag hevur prógvað í síni longu søgu. Felagið hevur eina langa siðvenju fyri at ganga undan at viðgera skúlaskap, pedagogikk, innihald í læringini og at útvega amboð til at røkka málunum.
Profetiirnar halda vónandi
Eilif Samuelsen spyr at enda, um hetta er profetisk tala hjá undirritaða, at vit nú skulu tosa um innihald og mál, heldur enn um sáttmálaviðurskifti og pengar. Og svarið er: Ja, vónandi verður tað profetisk tala.
Eg vóni, at vit nú hava ruddað upp í tí mesta, sum hevur ligið á láni, soleiðis, at teir praktisku spurningarnar fara at menna seg nattúrliga við okkara málum fyri skúlan.
Profetiirnar hjá Eilifi
Hinvegin kann eg sláa fast, at profetiirnar hjá Eilifi Samuelsen, hava víst seg at vera luftkastellir.
Serliga Tjóðveldisflokkurin og Signar á Brúnni vístu á og ávaraðu um tær vantandi fyrireikingaranr og tær vantandi fíggjarligu metingarnar og raðfestingarnar, tá nýggja fólkaskúlalógin varð skundað ígjøgnum. Men Eilif Samuelsen segði fyri Løgtinginum, at nýggja fólkaskúlalógin fór ikki at kosta nógv meira. Kanska eina millión meira um árið til sjálvan fólkaskúlan og so einar 6 milliónir til forskúlaskipan, varð sagt tá.
Til upplýsingar, so hava vit síðani 1997, tá Eilif sat sum landsstýrismaður, økt játtanina til fólkaskúlan við 73 milliónum krónum.
So góði Eilif Samuelsen. Eg hevði ynskt at tú hevði hugsað longur fram, gjørt fyrireikingar og gjørt nakrar haldbarar profetiir, áðrenn tú legði fólkaskúlalógina fyri tingið.
