Felagið vísir á, at kanningar uttanlands vísa, at í krepputíðum minkar privata virksemið, meðan tað almenna virksemið veksur.
– Fyri at bøta upp á hetta, verður skotið upp, at ein miðvís útveiting verður gjørd, við tí endamáli at skapa virksemi á vinnuligum grundarlagi og at mikna um almennu útreiðslurnar.
Hetta verður í okkara grannalondum ofta gjørt við at bjóða út uppgávur sum reingerð, rakstur av kantinum, vaktartænastu, viðlíkahald av bygningum, KT-tænastur og rakstur, koyring og verkstaðararbeiði v.m., sigur Føroya Arbeiðsgevarafelag.
Kári P. Højgaard, landsstýrismaður, segði herfyri, at tað at »sýna bilar skal ikki vera ein uppgáva hjá privatum verkstøðum«.
– Hetta verður sagt, hóast tað eru 11.000 bilar, sum bíða eftir at sleppa til regluligt sýn, sigur arbeiðsgevarafelagið.
Felagið vísir á, at nøkur verkstøð eru góðkend at vátta, at sýnsskaðar verða umvældir. Tá kann kundin fara til verkstað eftir at hava fingið krossar frá Akstovuni at gera skaðan uttan at møta uppaftur til sýn hjá Akstovuni. Í slíkum førum sendir góðkenda verkstaðið eina váttan til Akstovuna.
Í Danmark eru tað privatar fyritøkur, sum sýan bilar. Umvælingar verða gjørdar á øðrum verkstøðum. Arbeiðsgevarafelagið heldur, at við eini slíkari skipan fær man ikki fleiri krossar, enn neyðugt.
– Hetta kann ivaleyst eisini gerast í Føroyum. Tað kundi verið eitt krav, at sýn verður framt á einum verkstað 1, meðan umvælingin verður gjørd á einum verkstaðið 2. Uppgávan hjá Akstovuni kundi so verið at havt eftirlit við bilverkstøðum, heldur Føroya Arbeiðsgevarafelag.
