Brúkaraprísirnir annan ársfjórðing vísa, at í miðal eru prísirnir øktir bæði í mun til fyrsta ársfjórðing í ár og sama ársfjórðing í fjør.
Samanborið við fyrsta ársfjórðing í ár er brúkaraprístalið økt 1,1 prosent, og samanborið sama ársfjórðing í fjør eru brúkaraprísirnir í miðal øktir 3,1 prosent.
Tað vísir uppgerð hjá Hagstovuni.
Brúkaraprístalið er yvirskipað sett saman av 12 vøru- og tænastubólkum. Tað er ymiskt, hvussu stóra ávirkan vørurnar og tænasturnar hava á brúkaraprístalið. Býtið av nýtsluni hjá brúkaranum er avgerandi fyri, hvussu nógv vørurnar og tænasturnar ávirka prístalið.
Í mun til árligu broytingina í umleið 3 ár innan korona rakti, hevur árliga broytingin í brúkaraprístalinum í Føroyum og aðrastaðni í Evropa hesa fyrstu tíðina við koronu ligið á lægri stigi, men seinastu tvær uppgerðirnnar vísa nú aftur lutfalsliga stóran samlaðan prísvøkstur.
Í Føroyum hevur prísurin á flutningi verið fyri størsta vøkstri seinasta árið – heili 8,5 prosent. Prísurin á býli er vaksin 4,6 prosent, og prísurin á frítíð og mentan er vaksin 4,4 prosent.
Prísurin hjá hotellum og matveitarum er minkaður 1,4 prosent.
##med2##
