Kenyanski presturin sannførdi tær barnleysu kvinnurnar um, at tær vóru vorðnar við barn við Jesu hjálp.
Bretska løgreglan tók í gjár tann 54 ára gamla prestin Gilbert Deya, eftir at myndugleikarnir í Kenya hava biðið um at fáa hann útflýggjaðan.
Síðani hann kom til Bretlands, hevur presturin skipað samkomur í Birmingham, Nottingham, Liverpool og Manchester, har hann hevur boðið sær til at hjálpa barnleysum hjúnum at fáa børn ígjøgnum "kraftarinnar bøn".
Í heimlandinum er Gilbert Deya skuldsettur fyri at hava burturflutt minst tjúgu børn. Myndugleikarnir siga, børnini vórðu burturflutt og seinni latin barnleysum kvinnum, sum fult og fast trúðu presti, tá hann greiddi teimum frá, at hetta vóru teirra børn. DNA-royndir hava síðani prógvað, at kvinnurnar blivu lumpaðar, og tí vilja myndugleikarnir í Kenya hava fatur á presti.
Ein av teimum lumpaðu kvinnunum hevur greitt bretsku myndugleikunum frá, at hon fór til Kenya í september í 2003 eftir boðum frá Gilbert Deya. Tíggju mánaðir seinni, í juni í 2004, hevði hon fingið trý børn. Kvinnan greiddi frá, at hon fekk fleiri sproytur, og at hon var sannførd um, at hon var við barn við Jesu hjálp.
