Premier League í gongd við einum braki

Í gjár vóru fyrstu dystirnir í fyrsta umfar í Premier League í nýggja kappingarárinum. Tað byrjaði við einum braki, tí tað kom ferð at málskjótingina longu í fyrstu dystunum. Serliga á Anfield var málrok, tá Liverpool vann 4-3 á einum spennandi Leeds-liði.

Liverpool skal á fyrsta sinni verja eitt meistaraheiti í Premier League, meðan Leeds er aftur í bestu deildini fyri fyrstu ferð í 16 ár. Bæði liðini skulu venja seg við nýggju umstøðurnar, og tað bleiv til málrok, tá Jurgen Klopp, venjari hjá Liverpool, sendi sínar menn á vøllin at spæla móti væl lýdda argentinska venjaranum, Marcelo Bielsa og hansara Leeds United.

Tað endaði við 4-3 sigri til Liverpool, sum tvær ferðir fekk brotsspark. Mohamed Salah skoraði hattrik. Tríggjar ferðir megnaði Leeds at javna í dystinum, men tá Mohamed Salah skoraði til 4-3 stutt fyri tíð, var ongin orka eftir hjá Leeds United, sum verður spennandi at fylgja í ár. Liðið spælir við nógvari orku og bjóðar av. Eisini á útivølli móti meistarunum, sum nú ikki hava tapt í 60 dystir á Anfield.

Arsenal kom eisini væl í gongd. Undir Mikel Arteta, sum tók við í farna kappingarár, hevur Arsenal vunnið FA Cup og stórsteypadystin. Í gjár sá eisini út til, at Arsenal hevur fatur á rætta endanum. Arsenal vann 3-0 á útivølli móti uppflytarunum úr Fulham.

##med2## 

Crystal Palace heldur framvegis fast í Wilfred Zaha, sum fleiri ferðir hevur verið á veg úr felagnum. Tað kunnu teir fegnast um, tí Wilfred Zaha skoraði avgerandi málið í 1-0 sigrinum á Southampton. Newcastle vann 2-0 á útivølli móti West Ham. Callum Wilson og Jeff Hendrick, báðir nýggir, skoraðu málini.

Dystirnir millum Burnley-Manchester United og Manchester City-Aston Villa eru útsettir. Í dag eru tveir dystir á skránni. West Bromwich fær vitjan av Leicester City, og Tottenham fær vitjan av Everton.