Í dag hevði P/f Postverk Føroya aðalfund sín. Eftir niðurskrivingar, avsetingar og skatt er úrslitið eitt hall uppá 9,2 milliónir krónur.
Á aðalfundinum koma fram, at sølan í 2011 var gott 90 mió krónur í mun til 94 mió kr árið fyri. Úrslitið áðrenn avskrivingar og rentur, var eitt hall á 168 túsund kr., í mun til eitt hall uppá 1,6 mió kr í 2010.
Eftir niðurskrivingar, avsetingar og skatt er úrslitið eitt hall uppá 9,2 mió kr., í mun til eitt hall uppá 4,9 mió kr eftir skatt í 2010.
2011 var serliga merkt av niðurskrivingum av virðum á akførum og bygningum. Samlað eru bygningar og akfør niðurskrivað og útreiðsluførd við 7,2 mió kr, umframt at 2 mió kr eru útreiðsluførdar í uppsagnarlønum og reguleringum.
Nevndin varð afturvald, við undantaki av Brynhild Setberg, næstforkvinnu, sum ikki ynskti afturval. Í hennara stað er vald Joan B. Poulsen.
Nevndin hevur skipað seg við Hákuni Steingrímssyni sum formanni og Reidari Nónfjall sum næstformanni. Hini í nevndini eru Aibritt á Plógv, Joan B. Poulsen og starvsfólkaumboðini Áslak Tausen og Jens Peder Jensen.
(savnsmynd)
