Pia Kjærsgaard leggur frá sær sum forkvinna fyri Dansk Folkeparti, og hon peikar upp á Kristian Thulesen Dahl sum avloysara sín, skriva danskir miðlar.
Pia Kjærsgaard hevur verið forkvinna í Dansk Folkeparti í 17 ár. Í dag kunnaði hon tingbólkin um avgerðina, sum bert fá hava vitað um hesar sjey mánaðirnar, meðan hetta hevur verið planlagt.
Pia Kjærsgaard sigur í samrøðu við Berlingske Tidende, at hon vil fara við virðing. Hon sigur, at hon so mangan hevur sæð, at floksformenn eru farnir frá upp á tann keðiliga mátan. Annaðhvørt hava teir fingið sekkin, eru tvungnir frá, ella hava tapt eitt val eftir ein vánaligan valdyst.
So eg havi ikki ætlað, at tað skal henda fyri meg, sigur Pia Kjærsgaard, sum heldur fram sum talsfólk í virðismálum og hon stillar eisini upp til næsta fólkatingsval.
Avloysarin hjá henni, 43 ára gamli Kristian Thulesen Dahl, skal veljast av limunum á ársfundinum hjá Danska Fólkaflokkinum í september.
