Pedofilar er so mangt

Seinastu mánaðirnar hevur alt Før­oya­land verið á gosi um mongu pedofilarnar og teirra off­ur, ið eitt fyri og annað trína fram og greiða frá síni søgu. Eisini er bólkur stovnaður á internetinum, ið hevur sum mál at steðga allari pedofili í Føroyum.
Men ber tað til at rudda allar pedofilarnar út úr Føroyum? Hvørjir eru hesir pedofilarnir? Og hvørja revsing fær ein abbi, fosturpápi ella ungur drongur, sum hevur havt kynsligt sam­band við eitt barn?
Hetta er eitt evni og spurn­ingar, sum upptaka mongu úti­setar okkara eins væl og føroy­ing­ar í Føroyum – og tí hevði Ghetto Føroyar valt at varpa ljós á hetta.
Til at skifta orð um evnið vóru tveir gestir í studionum í Bank Nordik á Amager: Bjørt Lind, sum skrivar spesiali um mis­nýtt børn og hevur starv­ast á Ríkissjúkrahúsinum í Keyp­manna­havn, á deildini, sum hevur við seksuelt misnýtt børn at gera. Og Jan Klein Olsen, sum lesur løgfrøði og hevur arbeitt í ákæru­valdinum hjá løgregluni í Norðursælandi.
Bjørt Lind greiddi frá, at tað, sum millum mannað verður rópt pedofilar, ikki kann skerast yvir ein kamb. Tað eru ymisk sløg av fólk­um – serliga monnum – sum gera seg kynsliga inn á børn. Nakrir pedofilar eru eis­ini sálarliga sjúkir, men ikki allir, og nakrir menn fáa ikki pedo­filar tankar fyrr enn á gamals­aldr­inum, meðan aðrir eru føddir við hesum.
Jan Klein Olsen greiddi frá løg­frøðisliga partinum av málum sum hesum. Og løgfrøðin er køld og kontant og við revsilógini verð­ur bara hugt ítøkiliga eftir gerðunum, um samlega hevur verið , um gerningsmaðurin fekk út­loysing og so framvegis. Út frá hesum verður so støða tikin til, hvør dómurin skal vera – og har er tað dómarin, sum eina og aleina avgerð, hvussu hørð revs­ingin skal vera. Í Føroyum kann henda vera millum nakrar fáar mánaðir og upp í 12 ár.
– Men tað eru heilt serlig ting, sum spæla inn, tá onkur verður dømdur 12 ára fongsulsrevsing, vísti Jan Klein Olsen á.
Talan var um sera drúgt og upp­lýsandi orðaskifti, har av­hoyr­ingarhættir, leikluturin hjá barninum, sálarfrøðin á økinum, skuldarkensla og alternativar revs­ingar vórðu umrøddar. Orða­skiftið kann hoyrast í síni fullu longd á Facebook-síðuni Ghetto Føroyar.