Tað verður entreprenørfelagið Falkon úr Saltnesi, sum skal breiðka 250 metrar av Agninum fyri Nes kommunu. Hin 5. oktober var lisitatión, og í gjár undirskrivaðu Falkon og Nes kommuna undir sáttmála.
Kommunan hevði bjóðað níggju arbeiðstakarum at geva tilboð upp á arbeiðið, og tað vóru fýra arbeiðstakarar, sum lótu boð inn. Arbeiðstakararnir vóru hesir:
1. Falkon 2.455.474 kr.
2. JHR 2.464.682 kr.
3. RTS 2.825.200 kr.
4. Kreton 3.060.500 kr.
Í Nes kommunu siga tey, at aftrat tilboðskostnaðinum kemur kostnaður fyri keyp av lendi, gøtulyktum og projektering.
Vegurin frá íbindingini í Nesveg og 250 metrar niðan verður dagførdur, og gongubreyt verður gjørd. Eftir dagføringina verður koyrivegurin seks metrar breiður, og gongubreytin verður 1,5 metrar breið. Eisini verða nýggjar kloakk- og vatnleiðingar lagdar, eins og nýggj gøtuljós verða sett upp.
- Arbeiðið byrjar seinni í ár og verður liðugt komandi summar, siga tey í Nes kommunu.
