Føroyski ítróttarheimurin og ivaleyst Føroyar og føroyingar sum heild bíða í spenningi, nú tað bara snýr seg um minuttir, áðrenn størsta føroyska ítróttarnavn nakrantíð, Pál Joensen, fer at svimja finalu í 1500 metra fríkappingini í HM, sum í hesum døgum er í Doha.
Pál Joensen vann fyrr í ár silvur á 1500 metra teininum í EM á langgeil. Tíðirnar hjá teimum, sum skulu luttaka í finaluni, benda á, at vágbingurin hevur góðan møguleikar at vera við í kappingini um heiðursmerkini nú seinnapartin.
Tað er møguleiki at fylgja royndini hjá Páli at røkka fram millum teir bestu í heiminum. Sjónvarpið hjá Kringvarpinum sendir frá klokkan 16.20.
