Tann stóri sigursharrin á pakistanska valinum í gjár má sigast at vera flokkurin hjá fyrrverandi forsætisáðharranum Nawaz Sharif. Eisini flokkurin hjá Benazir Bhutto stóð seg væl, men flokkurin fekk tó ikki tær nógvu samkensluatkvøðurnar, sum teir flestu eygleiðararnir høvdu væntað.
Hóast uppteljingin ikki var liðug um middagsleitið, vildi almenna sjónvarpið vera við, at teir báðir stóru andstøðuflokkarnir, PML-N hjá Nawaz Sharif, og PPP hjá Benazir Bhutto, høvdu vunnið valið. Tað váttaði flokkurin hjá Pervez Musharaf, forseta eisini.
- Vit eru til reiðar at fara í andstøðu, um úrslitið verður, at vit hava tapt, segði ein talsmaður hjá PML-Q, sum er flokkurin hjá Musharaf.
Undan valinum í gjár var PML-Q størsti flokkur í tjóðartinginum við 130 tinglimum, men vóru forsagnirnar um middagsleitið eftirfarandi, fekk flokkurin bara 25 tinglimir í gjár.
Eisini samgongan av islamskum flokkum, MMA, fekk eftir øllum at døma ein dyggan frammaná. Fyribilstølini vístu, at flokkurin fær minni enn fimm tinglimir hesaferð ímóti 50 á seinasta vali.
