FIFA hevur júst kunngjørt nýggjasta styrkilistan og Føroyar halda fram við at detta longur og longur niður. Vit liggja nú nummar 175 av 207 fótbóltstjóðum. Tað ljóðar løgið, tí eitt nú standa okkara feløg seg væl í evropsku kappinginum og vit spæla ikki illa í landsdystunum. Vit mundu enntá tikið minst eitt stig frá Svøríki og enntá Italia á Tórsvølli fyri ikki so langari tíð síðan.
So hví liggja Føroyar og rótað niðast á FIFA styrkilistanum og kappast við Mauritius og Yemen, og mugu hyggja langt upp til Bermuda á 156. plássi?
Orsøkin liggur í alt ov fáu kappingarføru venjingardystunum, sum føroyska landsliðið spælir. Bermuda vann fótbóltskappingina á Oyggjaleikunum í ár. Bara við at síggja brot úr tveimum av dystunum hjá teimum er øllum greitt, at føroyska landsliðið er væl sterkari enn teir. Hetta sæst tíverri ikki aftur á FIFA styrkilistanum, sum vísir eitt føroyskt lið, sum ikki megnar at spæla upp móti fleiri av hinum smátjóðunum.
Fyrr í ár tók Fótbóltssambandið so av at spæla móti einum teilendskum landsliðið, sum vit enn tann dag í dag ikki vita hvat var fyri nakað. Onkur vildi verða við, at hetta var ein altjóða góðkendur landsdystur, meðan onkur annar heldur seg vita, at so var ikki. Talan var hvørtfall ikki um eitt gott avrik og heldur ikki um eitt gott teilendskt landslið – mannað við onkrum, sum líkist einum U21 ella U23 landsliðið hjá teimum. Vit taptu so dystin.
Landsdysturin móti Íslandi er eitt fínt átak, sum helst fíggjarliga passar báðum pørtum væl. Tað kundi eisini verið skeg, um íslendingar eisini komu hendan vegin onkuntíð, so føroysku áskoðararnir kunnu síggja landsliðið hjá sær í aktión uttan at talan er um undankappingardyst.
Men ber tað ikki til at spæla venjingardystir móti øðrum smátjóðum og spennandi fótbóltstjóðum uttan Íslandi?
Tað kundi jú hent seg, at vit yvirhálaðu Oyggjaleikameistararnar á FIFA styrkilistanum. Tað hevði sømt seg, nú vit ikki tíma at luttaka í fótbóltskappingini á Oyggjaleikinum, tí vit eru ov góðir.
Verjan – ongin Odmar
So hvat skulu vit vænta okkum av landsliðnum í Íslandi? Okkara helst sterkasti miðverji, Odmar Færø, er skaddur. Hann vónaði at koma fyri seg til nýggja kappingarárið í Forfar Atletic í skotsku triðju deild. Tíverri fyri hann og føroyka landsliðið, so er skaðin blivin verri aftur og tað er óvist nær sterki miðverjin kann spæla fótbólt aftur.
Um hugt verður eftir hópinum, so er líkt til, at Viljormur Davidsen og Jónas Tór Næs spæla á bakkunum, meðan tað verða Atli Gregersen og Rógvi Baldvinsson í miðverjuni.
Ein møguleiki er, at Pól Jóhannus Justinussen spælir á vinstra bakki, men tað er ósannlíkt eftir fleiri misjøvn avrik á tí plássinum. Heldur reisti hann seg og spældi væl á vinstra miðvøllinum móti millum annað Svøríki.
Miðvøllurin – Ikki Hallur, Fróða og Holst
Tað hevur ikki eydnast væl við Fróða Benjaminsen og Halluri Hansson á miðvøllinum, tá triði maðurin er Christian Lamhauge Holst, sum tó ikki er við á ferðini. Fróði og Hallur líkjast ov nógv og hava mangan báðir hug at fara eftir bóltinum, tá rætta samansetingin heldur hevði verið, at annars stóð stinnur á verjukenda miðvøllinum.
Tað er ongin ivi um, at báðir eru framúr góður fótbóltsspælarar og skulu helst byrja inni, men tað tykist hava størri týdning, at samansetingin á miðvøllinum er tann rætta.
Ein møguleiki er Heini Vatnsdal, sum var besti spælarin í føroysku kappingini fyrsta triðingin. Tá hevur tú tríggjar mans, sum allir arbeiða knallhart og vinna sínar nærdystir. Hóast allir hava evnir frameftir vøllinum, so eru teir samanlagt meiri verjukendir enn um Christian L. Holst er inni.
Ein annar møguleikin er Súni Olsen, sum tó hevur givið avboð til dystin. Hann gjørdi góðan mun í Írlandi, men var minni góður móti Svøríki og mátti fara av vøllinum skaddur. Í hansara stað er komin Karl Løkin, men tað er heldur ósannlíkt, at hann spælir nakran størri leiklut í júst hesum dystinum.
Seinasti møguleikin er, at geva flyta Jóan Símun Edmundsson aftur á framrættaða miðvøllin. Hetta gevur tó helst somu støðu sum við Holst á framrættaða miðvøllinum, har tað ikki tykist rigga so væl við Halluri og Fróða aftanfyri.
Jóan Símun Edmundsson arbeiðir helst harðari enn Christian L. Holst, men Holst hevur munin á bóltinum. Hvørtfall tað vit hava sæð á landsliðnum higartil. Við tíðini verður Jóan Símun ein natúrligur avloysari fyri Holst á framrættaða miðvøllinum.
Álopið – Her
má broyting í
So er álopið eftir. Og tað riggar ikki serliga væl fyri tíðina. Jóan Símun er einsamallur maður á fremsta plássinum, meðan teir á vonginum ikki hótta nakað serligt. Stutt og greitt, so hevur samanspælið millum tríggjar teir fremstu ikki eydnast nóg væl í eina tíð.
Tí kundi verið smart hjá Lars Olsen, at roynt okkurt nýtt. Ein møguleiki er at flyta Jóan Símun á annan vongin ella á framrættaða miðvøllin, fyri síðani at gera pláss fyri Arnbirni Hansen ella Pálli Klettskarð sum fremsta manni.
Kjakið, um Arnbjørn er rætti maðurin til landsliðið, fer nokk altíð at deila viðhaldsfólkini í tvey. Tað eru tey, sum halda at hann er ov dovin til landsliðsfótbólt, og so tey, sum vísa á at hann skorar tá hann spælir. Bæði fyri landsliðið og EB/Streymi í altjóða fótbólti.
Símun Samuelsen, Daniel Udsen og vrakaði KÍ liðskiparin, Hjalgrím Elttør, eru ikki við í Íslandi. Nógv bendir á, at Pól Jóhannus Justinussen heldur fast í sínum plássi vinstra vongi. So eru fýra mans um vongplássið í høgru.
Teir eru Christian R. Mouritsen, Leif Niclasen, Kaj Leo Í Bartalsstovu og so Jóan Símun Edmundsson, Christian er uppleggjarin, Leif er maðurin, sum rakar málið, meðan Kaj Leo er undirhaldarin við spennandi bóltførleikanum. Jóan Símun er so maðurin, sum hevur takið á øllum, men eins væl kann spæla á onkrum av hinum plássunum.
Tað stutta av tí langa er, at framrættaða spælið hjá okkum hevur ikki verið nóg gott í eina tíð. Vit mugu finna eina samanseting, ið er meiri hóttandi enn tað vit hava sæð síðani Rógvi Jacobsen gavst. Tað er júst tað við skulu brúka ein venjingardyst og vónandi er Lars Olsen komin nærri svarinum um 23 tíðina í morgin, tá dómarin bríkslar fyri seinastu í 11. uppgerðini millum Føroyar og Ísland.
