Í HB hava teir ikki langa tíð at hvíla seg eftir vónbrotið í steypakappingini mikukvøldið. Longu seinnapartin leygardagin eigur HB heimadyst ímóti ÍF.
Í landskappingini hevur tað higartil gingið væl hjá HB, sum framvegis ikki hevur tapt. Sigfríður Clementsen hevur ikki havt nógvar møguleikar at seta sínar menn upp. Setningurin er at fáa teir aftur í góða lagið, sum teir mikukvøldið vístu í 1. hálvleiki ímóti EB/Streymi. Og so er spurningurin, hvør skal taka uppgávuna á seg, um tað verður bríkslað fyri brotssparki til HB!
Hjá fuglfirðingum royndist tað væl í fyrstu umførunum, men síðani er stígur komin í. Tríggjar tær síðstu ferðirnar hevur ÍF einki stig vunnið! Tá ið ÍF fyri viku síðani tapti 2-1 á heimavølli ímóti EBStreymi, var avrikið gott. Trupulleikin var, at tað ikki eydnaðist at vinna úrtøku úr møguleikunum. Tað er ein stórur trupulleiki!
Í báðum legunum er tað kapping um plássini á liðnum. Onkrir spælarar eru ivasamir. Eitt nú Jan Ó. Ellingsgaard hjá ÍF, sum orsaka av skaða ikki var við ímóti EB/Streymi
HB - ÍF: Rúni Gaardbo
leygardagin klokkan 17.00
