Vágbingar vístu enn einaferð hetjuni úr Vági heiður. Pál fekk móttøku við fýrverki og fagnaði. Skipað var fyri, at til bar at heilsa uppá Pál og Jón í Billardhúsinum í Vági. Umframt røður, fingu teir gávu og blómur frá Vágs Býráð.
Á móttøuni í Havn fyrr um dagin, segði Jon Hestoy, at slíkar løtur var tað heimsins lættasta arbeiðið at vera formaður í Svimjisambandinum.
– Vit hava svimjarar, sum levera úrslit, ið ongin nakrantíð í lívinum hevði droymt um, at nakað ítróttarfólk kundi gera, segði formaðurin í Svimjisambandinum.
– Eg eri vísur í, at við, at við hjálp frá góðum stuðlum og landinum, er hetta ikki endin av tí, sum svimjararnir kunnu røkka, men bara byrjanin.
Fremsta úrslitið hevði, ikki óvæntað, Pál Joensen, sum vann tvær gull, tríggjar silvur og eina bronsu.
– Eg tori at siga, at hetta er besta úrslit, nakar ítróttarfólk nakrantíð hevur vunnið í eini altjóða kapping, segði Jon Hestoy.
– Hann er ein viti í føroyskum ítrótti, legði Edvard Heen, stjóri í Tryggingini afturat, sum annars fegnaðist um hetta fantastiska bragdið hjá føroysku svimjarunum. Hann hevði enntá hug at samanbera Pál við legendariskar svimjarar sum Mark Spitz og Michael Phelps.
Hann helt, at leikluturin, sum familjan hevur fyri slík úrslit, má ikki undirmetast.
– Kanningar vísa, at nógv flestu ítróttarfólk, sum koma í fremstu røð, hava eina familju, sum stuðlar treytaleyst og tað krevst fyri at koma heilt á tindarnar.
Á myndini eru frá vinstru, Jón Bjarnason, venjari, Magnus Jákupson, Pál Joensen og Birita Debes, svimjarar, Turið Kjørbo, fysioterapeutur og Rókur í Jákupsstovu, ferðaleiðari.
