Ein 20 ára gamal studentur er í Tingrættinum í Oslo dømdur at gjalda 12.000 norskar krónur í koronu-bót. Orsøkin til dómin er, at ungi maðurin í apríl mánaði í fjør var og vitjaði í einari íbúð í Oslo saman við trimum øðrum.
Um hetta mundið var ikki loyvt meira enn tveimum fólkum - aftrat teimum búgvandi - at vera saman í privatum heimum. Nú studenturin og tríggir aðrir vóru komnir á vitjan hjá einum vinmanni, vóru teir fimm í tali í íbúðini.
Í rættinum greiddi ungi maðurin frá, at hann helt tað vera loyvt fimm fólkum at savnast, eins og reglurnar í landinum annars vóru um hetta mundið.
Rætturin segði seg skilja, at ungi maðurin var í villareiði, tí ymiskar reglur vóru galdandi í Noregi, tá hendingin fór fram. Kortini helt rætturin ikki, at maðurin átti at sleppa undan dómi.
Hin 20 ára gamlli studenturin varð tískil í Tingrættinum í Oslo dømdur at rinda 12.000 norskar krónur í bót, sum svarar til slakar 9.000 krónur í okkara peningi, umframt sakarmálskostnaðin á 1.000 krónur.
Tað skrivar tíðindastovan NTB í dag.
