Tað er nú greitt, at ein loysn er funnin á ósemjuni ímillum Eiðis Kommunu og Sunda kommunu um felagsskúlan á Oyrarbakka.
Í Sunda kommunu hava tey ætlað at leggja skúlarnar saman á Oyrarbakka, men tað vildi Mentamálaráðið ikki góðtaka, fyrrenn kommunustýrini á Eiði og Sundalagnum, høvdu funnið eina semju um felagsskúlan á Oyrarbakka.
Men tað eydnaðist ikki kommununum at semjast um prísin. Síðani hava borgarstjórarnir tosað saman og úrslitið er, at tað eydnaðist pørtunum at semjast um ein prís.
Í gjárkvøldið samtykti kommunustýrið í Sunda kommunu at taka av tilboðnum frá Eiðis Kommunu, og í kvøld hevur bygdaráðið á Eiði staðfest semjuna, váttar Jógvan í Skorini, borgarstjóri á Eiði, í kvøld.
Og ætlanin er at skriva undir sáttmálan í morgin, sum ein annan dag.
Sostatt er greitt, at Sunda Kommuna keypir Eiði úr felagsskúlanum á Oyrarbakka, men prísin vilja tey ikki upplýsa enn. Hinvegin er eisini greitt, at børnini á Eiði fara at halda fram í framhaldsdeildini í Felagsskúlanum á Oyrarbakka.
Jógvan í Skorini, sigur at tey fara at hava ein kunnandi fund fyri bygdarfólkinum um skúlan. Hann verður í skúlanum á Eiði klokkan 19 í annaðkvøld, har kunnað verður um sáttmálan ímillum Eiðis- og Sunda kommunu.
Heðin Zachariasen segði fyrr í dag, at nú fer kommunustýrið í Sunda kommunu at arbeiða víðari við at leggja skúlarnar saman.
