- Hatta ljóðar ikki gott. Tað er ikki loyvt at selja til fólk undir 18 ár, og tey sum selja hava onga umbering, tí við hvørjum einasta loyvi, sum vit lata, verða reglurnar latnar á skrift. So øll sum selja, kenna lógina, er fyrsta viðmerking frá vakthavandi á politistøðini í Havn, tá vit siga honum okkara søgu.
Á trimum av fýra sølustøðum, sum vit hava vitjað í dag, vísir tað seg nevniliga, at aldursmarkið ikki verður hildið. 15 ára gamla gentan, sum Sosialurin hevur sent at kanna málið, slapp at keypa fýrverk uttan nakran trupulleika, hóast lógin sigur, at fólk skulu vera fylt 18 fyri at kunna keypa.
-Vit koyra runt til sølustøðini fyri at tryggja, at fýrverkslógin verður hildin, men vit fáa ikki staðið har allan dagin. Tá vit hava verið úti, hava vit ikki sæð nakað óreglusemi, men vit vita sjálvandi ikki hvat fer fram, tá vit ikki eru har, sigur vakthavandi.
Hann sigur, at sektin fyri at selja fýrverk til børn og ung er bót. Talan kann í serliga grovum førum gerast um hefti.
-Hatta ljóðar ikki gott, tí hatta er lógarbrot. Tað kann jú standast stórur skaði á børnini av fýrverkinum, so hatta er strangliga bannað, sigur vakthavandi.
Hann eggjar fólki til at melda tað, um tey koma fram á slíkt óreglusemi í sambandi við fýrverkssøluna.
