Ongar jólagávur til tey lítlu

Jólaumfarið í Premier League er komið at enda. 2. jóladag var fótbóltur at kalla allan dagin, meðan Chelsea, Manchester United og Manchester City settu punktum fyrrakvøldið og í gjár.

Chelsea hevur havt eitt hendingarík og misjavnt ár, har felagið millum annað er selt til amerikansan eigara. Týskvøldið var tó ongin ivi, tá Chelsea vann heldur lættan 2-0 sigur á AFC Bournemouth. Longu í fyrra hálvleiki  avgjørdu Kai Havertz og Mason Mount.

Seinni týkvøldið vann Manchester United greiðan sigur á Nottingham Forest. Uppflytararnir formáddu sær lítið í einum dysti, har Marcus Rashford og Anthony Martial komu á máltalvuna í fyrra hálvleiki. Í seinna hálvleiki setti Fred punktum við máli til 3-0.

Í gjárkvøldið var tað so Manchester City, sum setti punktum fyri jólafótbóltinum við einum 3-1 sigri á Leeds United. Erling B. Haaland skoraði tvær ferðir. Hann var tó ikki sjónliga glaður, tí hann hevur ein forkærleika fyri júst Leeds United. Pápi hansara, Alf Inge Haaland, spældið við júst Leeds United og Manchester City í síni tíð í Premier League.

Øll tey stóru vunnu í jólaumfarinum uttan Tottenham, sum spældi javnleik móti Brentford. Í botninum er avbera tætt.

Premier League 16. umfar:

26. desember:

Klokkan 12.30: Brentford – Tottenham 2-2

Klokkan 15.00: Crystal Palace – Fulham 0-3

Klokkan 15.00: Everton – Wolverhampton 1-2

Klokkan 15.00: Leicester – Newcastle 0-3

Klokkan 15.00: Southampton – Brighton 1-3

Klokkan 17.30: Aston Villa – Liverpool 1-3

Klokkan 20.00: Arsenal – West Ham 3-1

27. desember:

Klokkan 17.30: Chelsea – Bournemouth 2-0

Klokkan 20.00: Manchester United – Nottingham Forest 3-0

28. desember:

Klokkan 20.00:  Leeds – Manchester City 1-3