Hóast oljuprísurin er komin upp ímóti 74 dollarum fyri tunnuna, vísir tað framvegis ikki, hvussu nógv oljan í veruleikanum er verd, og tað eru ikki tey oljuframleiðandi londini, sum fáa vinningin.
Tað sigur iranski forsetin, Mahmoud Ahmadinejad, sum enn einaferð hevur sína ávarandi hond á lofti, nú altjóða samfelagið herðir trýstið á Iran fyri at fáa landið at gevast við sínum kjarnorkuætlanum.
Oljuúrdráttir verða seldir fyri prísir, sum eru tíggjutals ferðir hægri enn tað, sum tey oljuframleiðandi londini fáa. Tað eru harafturímóti ídnaðarlondini, sum fara við pengunum, sigur Ahmadinejad við iranska útvarpið. Kanadiski marknaðarserfrøðingurin Fadel Gheit gevur iranska forsetanum rætt. Hann sigur við AP, at oljuprísurin er tríggjar ferðir hægri enn tað, sum OPEC-londini fáa burturúr, og tí eru tað tey vesturlendsku oljufeløgini, sum fara við tí stóra vinninginum, sigur Fadel Gheit, sum starvast hjá kansiska íløgubankanum Oppenheimer & Co.
Í samrøðuni við iranska útvarpið segði Mahmoud Ahmadinejad, at tey oljuframleiðandi londini eiga at stovna ein oljugrunn, sum skal hjálpa teimum fátæku menningarlondunum, sum noyðast at innflyta olju.
Hinvegin nevndi hann ikki trætuna um kjarnorkuætlanina við einum orði, men hann hevur fyrr hótt við at steðga iranska oljuútflutninginum, ger umheimurin álvara av hóttanini um tiltøk ímóti Iran. Iranar útflyta 2,5 milliónir tunnur av olju um dagin, og ein steðgur kann fáa álvarssamar avleiðingar.
Iranskir politikarar hava eisini hótt við at taka eitt annað stig, sum kann fáa uppaftur álvarssamari avleiðingar. Herfyri ávaraði innanríkisráðharrin um, at Iran hevur eftirlitið við Hormus-sundinum, sum øll oljan úr Persaflógvanum fer ígjøgnum, og at landið er til reiðat at steingja sundið, gerst tað neyðugt.
