- Luttøkan hjá U18-kvinnulandsliðinum í European Open var eitt satt bragd, men kvinnurnar skulu heim at arbeiða við kropsligu styrkini,
sigur Oliver Jensen, sum hevur staðið fyri venjingini hjá U18-kvinnulandsliðinum. U18-kvinnulandsliðið gjørdist nummar 16 av 18 tjóðum Hóast fyrireikingarnar ikki hava verið eins drúgvar og hjá hinum londunum, er Oliver væl nøgdur við tað, sum kvinnurnar megnaðu.
- Sum heild byrjaði kappingin ótrúliga væl, men sum kappingin leið, vórðu kvinnurnar kroystar kropsliga. Vit høvdu eisini tann mest óroynda hópin í kappingini, skrivar Oliver Jensen á facebook-síðuni »Hondbóltskjak«.
U18-kvinnurnar taptu 14-13 fyri Rumenia, sum gjørdist nummar tvey til EM í fjør. Sìðani leiktu tær javnt móti Íslandi 11-11, taptu greitt fyri Noregi 26-12 og 20-15 móti Eysturríki. Kvinnurnar vunnu loksins sannførandi á Finnlandi. Í miðspælinum taptu Føroyar 30-20 fyri Litava og 29-17 fyri Eysturríki. Hóast Føroyar bert vunnu ein dyst og leiktu ein javnleik, sýndu tær framúr gott spæl í fleiri dystum, sigur Oliver Jensen.
Sambært Oliver Jensen skulu føroysku landsliðini og HSF arbeiða við hesum framyvir, um úrslitini til slíkar kappingar skulu betrast:
1. Framhaldandi veita mennandi venjingar, møguleikar fyri kappingum og nógvum dystum í landsliðshøpi.
2. Melda landsliðini til HM og EM-kappingar hvørt ár
3. Arbeiða við kropsligari venjing 3-4 ferðir um vikuna alt árið.
Oliver Jensen skrivar at enda, at leikararnir ynskja av øllum alvi at royna seg í líknandi kappingum framyvir.
