Í dag fekk Óli Mittún stóran heiður.
Svenska hondbóltsligan kunngjørdi á heimasíðu sínari, at Óli er valdur til All Star liðið í bestu svensku hondbóltsdeildini. Óli er valdur at vera miðbakkur/spælskipari á All Star liðnum.
Óli fekk 41 prosent av atkvøðunum.
Við heimasíðuna hjá hondbóltsliguni sigur Óli: - Tað er sjálvandi altíð stuttligt at fáa slíkar viðurkenningar. Hetta er jú annað kappingarárið hjá mær í svenskum hondbólti. Fyrra kappingarárið spældi eg ikki so nógv, men nú havi eg ein størri leiklut, ið eisini var meiningin. Eg haldi, at vit í Sävehof hava tveir góðar spælarar til hvørja posisjón á vøllinum. Tað kundi eins væl verið William "Wille" Andersson Moberg, ið fekk virðislønina. Tað gevur okkum nógv, at vit hava eina harða kapping á liðnum. Tað merkir, at ein veruliga má geva 100 prosent til venjingar og til dystir. Sigur Óli.
- Tá allir gera sítt besta, og vit spæla sum eitt lið, tá er tað einki lið í Svøríki sum er betri enn Sävehof. Tað hava vit víst mangar ferðir í heimligu kappingini og í Evropa hetta kappingarárið. Men vit hava eisini eitt lágt botnstøðið. Heldur Óli.
Við heimasíðuna hjá hondbóltsliguni staðfestir Óli, at talan verður um nakrar torførar finalur móti Ystad. Fyrsta meistaraskapsfinalan verður í Partille 2. hvítusunnudag, mánadagin 20. mai klokkan 17.
Kappingin hjá Óla Mittún higartil:
Dystir: 30
Mál: 166
Assist: 79
Útvísingar: 2
MEP-stig: 98,90
Kelda: Handbollsligan.se
