Tað er ikki farið framvið, at Manchester United í gjár tapti móti botnliðnum Sheffield United. Miðlarnir í Onglandi viðgera gongdina hjá Manchester United væl, og tað er breið semja millum bæði viðmerkjarar og ítróttarskrivarar, at hetta var ein gyltur møguleiki at halda fast í oddasessinum, sum nú er farin til grannarnar úr Manchester City.
Óvæntaða úrslitið hevur heldur ikki verið uttan eftirspæl. Bæði Ole Gunnar Solskjær, venjari hjá Manchester United, og liðskiparin, Harry Maguire, eru ónøgdir við dømingina í samband við fyrra málið hjá gestunum úr Sheffield United. Eisini bleiv eitt mál hjá Manchester United kolldømt.
- Vit manglaðu tað yvirskotið, sum gevur okkum tað síðsta. Teir verja væl og vit finna ikki loysnirnar. Teirra fyrra mál er fríspark, tí Billy Sharp rennur inn í David De Gea, og í hinum endanum var ikki fríspark, tá vit skora. Soleiðis er eitt kappingarnár nú eina ferð, men tvey mistøk av dómaranum, segði Ole Gunnar Solskjær eftir dystin.
Eftir dystin hevur eisini verið nakað av rokið á sosialu miðlunum, har nakað av rasistiskum málburði hevur verið brúkt móti Axel Tuanzebe og Anthony Martial. Fyrrverandi Manchester United spælarin, Rio Ferdinand, sum nú er viðmerkjari hjá millum annað Sky Sports, heldur fyri at revsingin fyri slíkt skal herðast.
Seiansti dysturin í 20. umfari í Premier League verður í kvøld millum Tottenham og Liverpool.
