Í kappingarskipanini hava Føroyar eitt vet betri seeding enn Libanon, sum er seedað nr. 98, meðan Føroyar er seedað nr. 83, men uppleggið til eina javna orrustu kom als ikki til sjóndar.
(1-0) IM Helgi Dam Ziska (2439) ? IM Eid Fadi (2387)
(1-0) Olaf Berg (2274) ? Sakr Nassim (2177)
(1-0) FM Carl Eli Nolsøe Samuelsen (2262) - El Jawich Amro (2105)
(½-½) Jóan Hendrik Andreasen (2217) - CM Kassis Antoine (2236)
Føroyameistarin, Olaf Berg, sum í dystinum varð ryktur upp á 2. borð, nú John sat yvir, prógvaði enn einaferð, at hann er hugaliga væl fyri í løtuni. Sama kann sigast um Carl Eli, sum telvdi eitt áhugavert og vælleikt talv, har mótstøðumaðurin stútt og støðugt varð trýstur av borðinum.
Í talvinum hjá Helga Dam Ziska, sat ein - eftir byrjunarspælið - við kensluni av, at í longdini, átti talvið at verða vunnið. Hetta hóast støðan, at síggja til, var jøvn. Við sera góðum teknikki og tolni, nógvar leikir seinni, varð sigurin veruleiki.
Leygarmorgunin telvar Føroyar ímóti Uganda, sum er seedað nr. 125.
Manningin hjá Uganda er, sambært seedingini, veikari enn tann føroyska, men tá tvey tey ovastu borðini ikki eru noteraði við ratingtali, er styrkimunurin ivaleyst væl minni. Tískil er lagt upp til enn eina spennandi uppgerð, har ein sigur hálar Føroyar upp eftir stigatalvuni.
Fylgið uppgerðini LIVE á: ugra-chess.com/results.php
Byrjað verður kl. 10.00, leygardagin.
Sí annars www.faroechess.com
