Vinnulívsfundur
Eysturoyar Vinnulívsfelag hevði sín árliga fund í fimleikarhøllini í Eiðis skúla í gjárkvøldi.
Tey, sum eru við á hesum fundi, eru vinnulívsfólk úr Eysturoy, saman við umboðum fyri kommunal-og landspolitikarar í oynni.
Vinnulívsfundurin er ikki almennur, men Sosialurin hevur tosað við borgarstjóran á Eiði, sum var við á fundinum, og tað var eisini Eiðis bygdaráð, sum bjóðaði til ábit eftir fundin.
Vit hava eisini tosað við Kristian Petersen, ið starvast hjá Kaupthing. Hann var ein av fýra fyrilestrarhaldarum á fundinum.
Orðstýrari var Jóannes Hansen, samfelagsfrøðingur.
Fundurin á Eiði var vælmøttur, og fimleikarhøllin var at kalla fullsett, tá ið Tordur J. Niclasen beyð vælkomin og í stuttum greiddi frá vinnulívinum í Eiðis kommunu.
Fýra fyrilestrar
Teir, sum hildu fyrilestrar á vinnulívsfundinum, vóru Tummas Arabo, fyrrverandi løgtings-og landsstýrismaður og Jóhan Dahl, løgtingsmaður. Teir tosaðu í fyrsta lagi um einskiljingar.
Tummas Eliasen, stjóri á Føroya Lívstrygging og Kristian Petersen, sum starvast hjá Kaupthing, tosaðu eitt nú um kapital um landamørk.
Kristian sigur, at hann legði dent á altjóðagerðina millum Føroyar og umheimin, og útgangsstøðið var, hvussu Kaupthing hevur gjørt við eitt nú at keypa seg inn í útlendskar fyritøkur.
- Kaupthing hevur ikki hildið tað verið neyðugt at uppfinna tann djúpa tallerkin við at stovna nýggjar fyritøkur í útlandinum, men hevur í staðin keypt seg inn í fyritøkur, sum hava verið rímiliga væl fyri.
Hann sigur, at tað soleiðis hevur eydnast felagnum at fáa avkast av íløgunum.
Einskiljingartos
Sum skilst, var áhugavert kjak á fundinum um ymisk vinnulívsmál, og tað skilst á øllum brøgdum, at tað kann gerast trupult hjá Bjarna Djurholm at einskilja Atlantsflog so skjótt, sum hann hevur miðjað eftir, at felagið skal einskiljast.
Tað er eingin loyna, at Tummas Arabo ikki er serliga heitur fyri fleiri av einskiljingarætlanum landsstýrisins, men á vinnulívsfundinum kom eisini fram, at heldur ikki Jóhan Dahl, løgtingsmaður, er serliga heitur fyri at einskilja Atlantsflog við tí ferð, sum landsstýrismaðurin hevur lagt upp til.
- Eg haldi, at føroyingar stúra fyri, at flogfelagið kann fara á útlendskar hendur, og tá ið hetta er lívæðrin hjá okkum úteftir, eru vit meira ansin við at lata felagið av hondum, siga okkara keldur.
Meira opið
Keldurnar halda esini, at vinnulívsfundurin var merktur av, at fundurin ikki var almennur.
- Eingir fjølmiðlar vóru við á fundinum, og tí loyvdu fólk og ikki minst politikarar, sær at tosa meira frá hjartanum, enn vit hoyra vanligt. Í so máta var hetta ein góður fundur, siga keldur okkara.
Tað vóru eisini tey, sum hildu, at føroyskir politikarar sum heild ikki eru nóg dugnaligir.
- Tá ið mál av stórum týdningi eru fyri á løgtingi, verður oftast farið út í smálutir, soleiðis at alt endar í einum ellubita og einki kemur burtur úr. Í byrjanini vita politikarar ofta, hvat teir vilja við einum máli, men sum tíðin líður, endar alt í smálutum, soleiðis at endamálið við málinum fánar burtur og at enda at kalla er gloymt burtur, siga keldurnar.
