Men brádliga ein morgun í farnu viku vórðu 2/3 av hesum virði ognartiknir, grundað á eina nærum einmælta løgtingssamtykt í fjør vár, sum heimilaði hesum.
2/3 av 60.000 - tvs. kr. 40.000 (ella fyri familjuna oman fyri kr. 200.000) vórðu við hesari løgtingssamtykt ognartiknar frá tær og mær. Ella vit kunu eisini siga, at við hesum varð ein eykaskattur av ókendum dimensiónum frá degi til dag lagdur á hvønn einasta føroying, frá elsta til seinast fødda pinkubarnið.
Jamen, tað almenna dugir jú ikki at reka bankar, hevur onkur kanska lært teg at svara mær, so var ikki upp á tíðina at selja hann?
Hesum uppáhaldi eri eg als ikki samdur í, men um so var, hví so ikki, ístaðin fyri at skipa eina sølu, ið gevur nøkrum fáum møguleika at ríka seg av ogn alra, geva hvørjum einstøkum føroyingi (bankaánara) sín part av bankanum sum partabræv? So kundi hann, hon ella tey gjørt av, um tey framvegis vildu eiga part av bankanum ella at umseta hesa ogn til krónur og oyru - og tá væl at merkja til fult søluvirði?
Saman við bankanum áttu tú og eg fornemmar ognir - málningalist fyri óivað trísiffrað millióna krónutal. Løgtingið viðgjørdi hetta áðrenn heimferð í vár, og lovað varð, at hesar ognir skuldu ikki seljast við bankanum, men framvegis vera ogn vanliga føroyinga.
Men longu dagin eftir at sølan var byrjað, trein embætismaður, høgra hond landstýrismansins í skúla- og mentamálum, fram, og kunngjørdi, at hesar ognir skuldu keypast frá bankanum. Vit, tú og eg, skuldu keypa tær frá privatiseraða bankanum, tí ”nú hevði sølan jú givið so nógv av sær til landskassan”. Tvs. at man ognartekur ogn tína, áleggur eykaskatt og síðani brúkar man skattapening tín at keypa, tína vegna, frá nýggju eigarunum tað, ið tú og eg frammanundan áttu.
Omaná alt pástendur man, at útlendskir serfrøðingar hava lagt hetta til rættis, og tað sambært bestu og fremstu serfrøði.
Frá mínum sjónarhorni er als ikki talan um serfrøði ella vísund, tíansheldur um vit ella skil. Haldi heldur talan vera um miðvíst tilrættalagda ognartøku, umfordeiling av ríkidømi og eykaskatt.
