Tað er TAKS, ið umsitur almennu koronalinjuna, ið vegleiðir og svarar spurningum, ið føroyingar hava um koronasmittuna.
Av oftast settu spurningunum, ið tey á koronalinjuni fáa, eru spurningar um 3. liðssamband við smittað fólk, og um hvussu fólk skulu fyrihalda seg til at hava fólk í vandabólkinum í húsinum.
Hesi svarini gevur koronalinjan til teir spurningarnar:
Maður ella kona mín hevur verið í sambandi við onkran, sum hevur verið í sambandi við ein, ið hevur fingið staðfest koronasmittu. Skal eg kannast?
– Nei. Í fyrstu atløgu skalt tú ikki kannast. Um so er, at tú skalt kannast, so setir landslæknin seg í samband við teg. Tá ger landslæknin eina greining av teimum, ið smittaði hevur verið í sambandi við. Landslæknin hyggur eftir, hvørjum smittaði hevur verið í sambandi við, og tey, ið skulu kannast, fáa boð frá landslæknanum.
Vit hava fólk í vandabólki í húsunum. Hvussu fyrihalda vit okkum til teirra?
– Tú skalt altíð vera eyka varin. Er eingin í húsarhaldinum sjúkur, verður tað mett sum verandi vanligt. Tú skalt ikki taka onnur atlit enn tey, ið vit mæla til í sambandi við koronasmittu. Tú skalt halda frástøðu, tú skalt halda reinførið, hosta í ermuna og vaska væl. Vaska ves og køkin væl, og tú skalt vaska klæðir, seingjarlín og líknandni við hitanum, sum verður tilmældur á korona.fo. Hevur tú ein í húsarhaldinum, sum er í vandabólki, skalt tú kanska hugsa um ikki at fáa gestir á gátt. Roynið at halda tykkum so nógv sum til ber í sjálvbodnum sóttarhaldi.
Meira er at lesa um spurningarnar til koronalinjuna í Vikuskiftissosialinum.
