Øll mistu uttan Erling og City

12. umfar í Premier League hevur verið um vikuskiftið. Í toppinum var tað bara Manchester City, sum fekk fult. Tað hevur millum annað givið pláss til nýríka Newcastle í topp fýra, meðan Fulham hevur munin á kreppurakta Liverpool.

Størsti skelkurin kom í havanum hjá Robin Hood í Nottingham, har heimaliðið á fyrsta sinni síðani miðskeiðis í 90 unum fekk vitjan av Liverpool í Premier League samanhangi. Heimaliðið vann 1-0 og kreppan í Liverpool sæst aftur, eftir tríggjar sigrar upp í slag til Jurgen Klopp og hansara menn.

Oddaliðið Arsenal spældi javnleik á útivølli móti Southampton, meðan meistarafavorittarnir úr Manchester City vunnu 3-1 á Brighton. Erling B. Haaland skoraði tvey av málunum. Nærmasti kappingarneyti er Tottenham, sum tapti 2-1 á heimavølli móti Newcastle, sum í løtuni liggur á fjórða plássi.

Størsti dysturin um vikuskiftið var á Stamford Bridge, har Chelsea tók móti Manchester United. Tað skuldi eitt brotsspark til fimm minuttir fyri tíð, at fáa lív í uppgerðina. Jorginho umsetti til mál til Chelsea, men í yvirtíðini javnaði Casemiro fyri gestirnar.

Tað er nú javnt í botninum, har Nottingha Forest hevur fingið samband við hini feløgini. Leicester City hevur vunnið stevið aftur og Aston Villa vann í  fyrstu royndini uttan Steven Gerrard. Størstu krepputeknini eru Leeds United og Wolverhampton, meðan West Ham óvæntað bara er tvey stig frá niðurflytingarstrikuni.

Ein dystur er í kvøld millum júst West Ham og AFC Bournemouth.