Hetta er ógvuliga álvarsamt, og vit fegnast um, at løgreglan tekur slík mál í so stórum álvara, at orsøkin verður funnin.
Nógv verður gjørt burtur úr fyribyrging av ymsum slag. Seinastu dagarnar hava vit hoyrt nógv um ein húk í Klaksvík, sum setir ferðslutrygdina í vanda, og sum er í stríð við null-hugsjónina, sum hevur sum endamál, at eingin skal doyggja ella verða álvarsliga skaddur í ferðsluni.
Hetta er alt mikið gott. Men vit kunnu undrast, hví so lítið verður gjørt við brunatrygd í føroyskum heimum. Øll vita, at eitt lítið bíligt tól, sum ein roykvarnari, sum kann keypast fyri lítlan penga, bjargar mannalívum. Tað er líka so vist, sum tað, at trygdarselin í bilinum bjargar mannalívum.
Kortini er eingin lóg, sum sigur, at øll heim skulu hava hesar roykvarnarar.
Tá tað ræður um trygd á arbeiðsplássum, tá eru nógvir myndugleikar á varðhaldi, og mong arbeiðspláss mugu lata loft ella kjallararúm standa óbrúkt, tí tey liva ikki upp til brunakrøvini.
Tað er mikið gott, at so nógv verður hugsað um trygdina hjá arbeiðsfólki, men tá so lítið verður gjørt burtur úr trygdini í heimunum, so heldur logikkurin líkasum ikki.
Seinastu dagarnar hevur tryggingarfelagið gjørt nógv burtur úr at greiða frá øllum gávunum til Føroya fólk. Ein fyrstuhjáltaska er send í hvørt hús. Tað er eisini í fínasta ordan.
Vit vita, at nógvir stórir skaðar og vanlukkur av eldi henda í heimunum. Tí átti tað at verið so sjálvtsagt, at eins strangar brunatreytir vórðu settar heimunum, sum arbeiðsplássunum og bilunum.
Tí ynskja vit, at til dømis okkurt tryggingarfelag keypir ein roykvarnara til hvørt húski. Tá høvdu vit verið 100% vís í, at mannalív vórðu bjargað - og uttan iva eisini stórar peningaupphæddir hjá tryggingarfeløgum og missur hjá privatfólki.
Vit vóna, at greiða fæst á málinum um sjónvarpsmóttakararnar. Eru teir vandamiklir, so eigur seljarin sjálvandi at taka teir innaftur.
Hinvegin halda vit, at myndugleikarnir eiga at taka seg saman og seta brunatrygdina í heimunum eins høgt, og trygd á arbeiðsplássum og ferðslutrygd. Latið nullhugsjónina eisini galda fyri heimini!
