Málið um setan av nýggjum stjóra á Vinnuháskúlanum hevur longu fingið álvarsamar avleiðingar fyri tvey aðalráð, sum hava mist sín aðalstjóra: Leivur Harryson er farin úr starvi sum aðalstjóri í Mentamálaráðnum, meðan Poul Geert Hansen er fluttur úr aðalstjórastarvi í Heilsumálaráðnum til Mentamálaráðið.
Tað er fallið fólkafloksmonnum fyri bróstið, at Hans Johannes á Brúgv varð vrakaður sum stjóri. Bjarni Djurholm, løgtingsmaður, hevur reist málið sum fyrispurning til Bjørn Kalsø í løgtinginum, har Bjarni Djurholm setir fram níggju spurningar um málið.
Meðan Bjarni Djurholm er meira varin, so er formaðurin í valfelagnum hjá Fólkaflokkinum í Havn, Jógvan Poulsen, meira kontantur. Hann sigur í lesarabrævi, har hann presenterar seg sum formann í Havnar Framburðsfelag, at talan er um hevnd hjá Bjørn Kalsø fyri svágin, sum Hans Johannes á Brúgv segði úr starvi á Vinnuháskúlanum:
– Spurningurin er tí, um grundgevingarnar fyri uppsøgnini av Hans Johannus á Brúgv eru samrøður heima við døgurðaborðið millum Bjørn og svágin. Hetta má kallast leyst og subjektivt grundarlag og setir eisini spurning við, um landsstýrismaðurin er ógegnigur í avgerðini.
Formaðurin í valfelag Fólkafloksins sigur beinleiðis, at misálit eigur at verða reist móti landsstýrismanninum – og hann mælir Fólkaflokkinum til at atkvøða fyri einum slíkum misálitisuppskoti.
– Bjørn má frá í stundini, soleiðis at skaðin kann bøtast mótvegis Leivi og Hans Jóhannes, sigur hann.
Hetta eru sera grovar skuldsetingar móti landsstýrismanninum. Talan er um skuldsetingar um korruptión og vina- og kenningapolitikk av grovasta slag, sum landsstýrismaðurin fríggjadagin má sannføra løgtingið um, at tær eru ósannar.
Málið kann fáa enn størri týdning, tí vrakaði aðalstjórin fer eftir øllum at døma í rættin við málinum, og endar tað við, at hann skal hava aðalstjóraløn í áravís fyri einki at gera, um ikki løgmaður finnur honum eitt ráðgevarastarv í landsumsitingini, so hevur løgmaður sjálvur ein stóran trupulleika.
Spurningurin er so, um Bjørn kárar at verja seg, ella um Fólkaflokkurin reisir misálit á mentamálaráðharran...
