Tað var boðskapurin hjá Johan Dahl, landsstýrismanni í ferðavinnumálum, tá hann mikudagin setti tiltakið í Norðurlandahúsinum, har Ferðaráðið avdúkaði nýggja brandið, sum skal marknaðarføra Føroyar sum ferðamannaland.
Og tað eru stór mál, sum Ferðaráðið – ið nú fer at eita Visit Faroeislands – hevur sett sær fyri at økja um ferðafólkatalið í Føroyum og stuðla uppundir, so ferðavinnan veruliga kann gerast ein stór vinnugrein í Føroyum.
Fram til 2020 skulu arbeiðsplássini, sum beinleiðis eru tengd at ferðavinnuni, verða tvífaldað eins og ferðafólkatalið, sum tá skal verða komið upp á 200.000 ferðafólk um árið.
Sambært kanningum eru góð 500 størv í Føroyum, sum beinleiðis eru tengd at ferðavinnuni. Endamálið er at tvífalda hetta talið næstu seks árini, kom fram í Norðurlandahúsinum mikudagin.
Vit kunnu bara fegnast um, at løgtingið samtykti at endurstovna Ferðaráðið, tí tað er brúk fyri einum slíkum stovni, hvørs fremsta endamál skal vera at marknaðarføra Føroyar uttanlands. Útlendingar skulu kenna Føroyar, og hava vit eitt gott felags positivt brand, sum bæði ferðavinnan og útflutningsvinnan kunnu brúka, so eigur tað at økja um tilvitskuna um Føroyar uttanlands.
Ferðavinna og upplivingarvinna er í vøkstri allastaðni, og vøksturin er javnur ár um ár. Soleiðis hevur tó ikki verið í Føroyum. Tí er einki at ivast í, at eitt slíkt tiltak við felags branding kann skava ávøkst.
Men vit hava hoyrt nógv av hesum fyrr. Ferðaráðið hevur fyrr eisini sett sær stór mál um at tvífalda ferðafólkatalið fram til aldaskiftið. Tann ætlanin kollsigldi og endaði við, at landssins stýri tók av Ferðaráðið.
Nú er at vóna, at veruligt tyngd er aftan fyri orðini, so tað verður til annað enn ryggklapparí í Norðurlandahúsinum.
Útlitini eru góð. Politiski stuðulin tykist grundfestur í øllum flokkum á tingi – og tað at løgtingið tvífaldaði játtanina hjá Ferðaráðnum í ár ber boð um, at vit hesaferð meina tað í álvara.
Vit eiga tí øll –hvør í síinum lagi – at stuðla uppundir at gera Føroyar til eitt gott land hjá ferðafólki at vitja.
