Útvarpið hjá Kringvarpinum setti í hesum sambandi floksformonnunum stevnu um nýggjárshalguna, og tað var eisini júst tað, sum eyðkendi sendingina. Eitt nú segði Jenis av Rana, at vit mugu hava eitt løgtingsval ongantíð ov skjótt. Høgni Hoydal tosar um val í vár og melur upp í saman um eina savningarstjórn, meðan Jóannes Eidesgaard ásannar, at heystið er gott at halda val í, eins og gamalt var, tí so fáa vit eina líkinda fíggjarlóg samtykta uttan órógv av vali.
Grundgevingarnar kunnu verða so mangar. Men júst vansin við at halda val í november var so mangan orsøkin til, at fíggjarlógin ikki fekst upp á pláss. Seinasta mansaldurin er tað bara eydnast eina ferð at skipa eina samgongu fyri jól, tá valið var í november. Tað var í 1970, tá Atli Dam skipaði sína fyrstu samgongu. Men vit kunnu samstundis ásanna, at síðani 1998 hevur tað tikið væl styttri tíð at skipað samgongu.
Vit kunnu so halda tað um samgongu og landsstýri, sum vit vilja. Men vit hava ta stjórn, vit hava valt. Tað høvdu vit eisini fyrstu mánaðirnar av hesum valskeiðinum, tá Tjóðveldi eisini sat í fremstu røð. Men tað tykist so barnsligt og fornermað at tosa um savningarstjórn ella bjargingarstjórn.
Álvaratos – ein andstøða má hava onkur hægri mál at seta sær.
Veljarakanningar síðani valið benda ikki á nakað stjórnarskifti. Tær vísa fyri so vítt bara, at Sambandsflokkurin etur sínar samstarvsflokkar, fyrst og fremst Javnaðarflokkin, sum hevur havt ilt við at prógva sín politikk – sína hugsjón í verki. Hann gjørdi eina roynd undan jólum at vísa vøddar og vísa, at flokkurin tordi at siga, hvar skápið skal standa. Ta ultimatumið, sum flokkurin setti, helt, og full semja fekst í fíggjarnevndini, meðan breið semja fekst í løgtinginum fyri fíggjarlógini.
Hetta vísir enn einaferð, at tað gongur betur at gera avtalur millum persónar á tingi enn millum flokkar – og er eitt skúladømi uppá, at politisku flokkarnir fungera í besta lagi illa.
Hóast tað er óvist, um vit fáa eitt várval ella eitt heystval til løgtingið, so tykist mangt benda á, at vit fáa eitt várval til Fólkatingið, og har benda kanningar á, at tey fáa eitt stjórnarskifti. So greiðar ábendingar hava vit ikki her, tí hóast samgongan varðveitir sína umboðan, so er tað eingin trygd fyri, at hon heldur fram eftir valið, tí blokkarnir í Føroyum verða skipaðir eftir valið, og samgongumøguleikar duldir sum mansmorð.
