Soleiðis skrivaði in.fo mikukvøldið í kjalarvørrinum av málinum um Oyggjaleikaumsóknina hjá ÍSF.
Ítróttarsamband Føroya hevur eftir øllum at døma verið so bláoygt, at tey hava trúð upp á eitt politiskt lyfti um, at ein golfvøllur skal verða tøkur til 2019, tá ætlanin er, at Oyggjaleikir aftur skulu verða í Føroyum.
Við hesum kann staðfestast, at tað heldur ikki ber til at skipa fyri altjóða ítróttarkappingin eftir politiskum ynskjum. Tað undrar tó ikki okkum, tí politisk lyfti verða so at siga altíð brotin, og eingin stendur til svars fyri tey.
Vit í Miðlahúsinum vóru eisini so bláoygd, at vit í 2007 settu okkum handilslig mál eftir einari politiskari semju í løgtinginum. Tað var, tá mentanarnevdin gjørdi ta so mangan umrøddu semjuna um, at lýsingar í almenna Kringvaprinum skulu niðurlagast eftir fimm árum, og at tá skuldi frí kapping valda.
Tá sum nú høvdu vit sokallaðan borgarligan flokk í Mentamálaráðnum, sum í sínum skjaldramerki erpar sær av fría initiativinum. Men tað heldur bara við hvørt og ikki til hvat sum helst.
Miðlahúsið gjørdi eina stóra milliónaíløgu í eina útvarpsstøð við teimum forútsetningum, sum politiska semjan legði upp til. Men hvat hendi? Politikararnir vendu øllum fullkomiliga á høvdið. Heldur enn at fáa kapping frá einari aðrari privatari útvarpsstøð, so valdi politiski myndugleikin at fíggja almenna public service kringvarpið við at fara í beinharða kapping við lítlu privatu rásina.
Kringvarpið skal brúka alt krútið og nógvar, nógvar almennar milliónir til at kroysta ta lítlu útvarpsstøðina av marknaðinum.
Tað var Fólkaflokurin, sum tá ráddi fyri borgum í Mentamálaráðnum. Síðani kom Tjóðveldið, so Javnaðarflokkurin og nú Sambandsflokkurin. Men øll hava verið líka myrkasvørt.
Eingin eigur at verða so bláoygdur at strýa eftir »politiskum vilja«. Eingin má trúgva »politiskum lyftum«, tí tað er í útgangspunktinum bluff.
Bæði løgmaður og mentamálaráðharrin hava lovað bøtt um støðuna hjá privatu miðlunum.
Men enn eru eingir glottar at hóma. Vit trúgva ikki lyftum. Men vit hava eina kóma vón um bata.
