Týsdagin boðaði Annika Olsen, landsstýriskvinna, frá, at stuðul nú verður veittur til verkætlanina.
Ítøkiliga merkir tað, at landsstýriskvinnan hevur gjørt av at lata Fountain Húsi tvær milliónir krónur í stuðuli til eina royndarverkætlan at seta á stovn eitt arbeiðsrættað tilboð til fólk, sum eru sálarsjúk ella hava sálarligar trupulleikar.
Stríðið fyri Fountain Húsinum hevur sín uppruna í lagnuni hjá Rasmusi Rasmussen, ið var sálarsjúkur og tók sítt egna lív á sjálvum sálarsjúkudegnum 10. oktober í 2012.
Longu nakrar fáar dagar seinni tók barndómsvinur hansara, Hergeir Staksberg, stig til at savna inn pening til Fountain Húsi, sum tá longu varð komið á breddan.
Fyrsta stigið var ein stuðulskonsert í Sjónleikarhúsinum í Havn. Síðani hava hópin av tiltøkum verið til tess at savna pening.
Tvær milliónir krónur eru nú játtaðar á fíggjarlógini fyri 2014, og tær eru markaðar til at skipa eitt arbeiðsrættað tilboð við Fountain Hús sum fyrimynd.
Tað er hetta, sum nú er vorðið veruleiki í Heinesenshúsum á Tinghúsvegnum í Havn.
– Endamálið við Fountain Hús er at skapa møguleikar hjá fólki við sálartrupulleikum/sjúkum at virka á jøvnum føti við aðrar borgarar í samfelagnum. Málið er, at fleiri sálarsjúk fáa eina meiningsfulla tilveru, sum gevur teimum innihald í gerandisdegnum, sigur landsstýriskvinnan í fráboðanini týsdagin.
Hetta málið er eitt gott dømi um, hvussu vit kunnu náa einum góðum úrsliti, hóast viljin hjá myndugleikanum ikki var til staðar.
Fólksligt trýst og fólksligur stuðul kann broyta politiska viljan, og tað er at fegnast um, at landsstýriskvinnan og øll tann politiska skipanin hevur skilt álvran í hesum máli, sum í veruleikanum snýr seg um at virða fólk við sálarsjúku.
Tað snýr seg um at viðurkenna, at sálarsjúka er ein sjúka, eins og aðrar sjúkur, sum eisini hava rætt til heilsubót – sum í hesum føri er at skapa teimum umstøður, sum kunnu slúsa fólk út aftur í arbeiðslívið, sum hava verið merkt av hesar sjúku.
Hetta er eitt gott tiltak, sum fyrireikararnir og myndugleikin eigur rós fyri.
