Tá løgmaður av sínum eintingum sendir síni sjónarmið út umvegis heimasíðuna hjá Løgmansskrivstovuni um, at vit seinastu árini eru komin í eina nýggja støðu viðvíkjandi makrelinum, har hann vísir á, at risa virði eru í makrelinum, og at vinnan er sinnað at lata tilfeingisgjald, so kann tað bara verða tekin um, at løgmaður er við at venda aftur til ta støðu, sum hann og Jóhan Dahl høvdu í minnilutalandsstýrinum síðsta summar.
Løgmaður vísir á, at vit noyðast at seta okkum spurningin, um tað ikki er rætt at taka eitt tilfeingisgjald fyri makrelin heldur enn at senda fólk til hús í hópatali, sum aftur merkir verri tænastu til borgaran.
Í somu grein á heimasíðu løgmans sigur hann seg fegnast um, at hallið á fíggjarlógini sambært álitinum frá fíggjarnevndini kemur niður á 361 milliónir krónur, og so vísir hann á ymsar sparingar og rationaliseringar, sum landsstýrið hevur gjørt.
Men tað skerst ikki burt, at pengar mangla í hjá løgmanni. Staðfestingin av, at hann ikki fekk blokkstuðulin hækkaðan við 200 milliónum krónum – og vitanin um, at hann heldur ikki fær tað í komandi ári ella næsta ár aftur ella nakrantíð aftur, hevur helst fingið løgmann upp á aðrar tankar.
Tað ber ikki til at byggja land í Føroyum við at vóna, at vit kunnu fáa pengar forerandi frá øðrum. Tað er gingið upp fyri løgmanni. Og hóast hann hevur rætt í, at tað var skeivt av øllum hasum fólkunum, hann hevur rundan um seg í Tinganesi, í óðum verkum at lækka blokkin fyri skjótt 10 árum síðani, so vendst ikki aftur. Tað er bara so. Hann hevur sjálvur sum løgmaður góðtikið hetta í fleiri ár. Tí kann hann bara verða gjørdur til láturs, meinti hann hetta, so skuldi hann gjørt beinanvegin. Tað er bara flokkur løgmans og Javnaðarflokkurin, sum eru »ósekir« í hesum. Men hetta slagið tapti løgmaður – eisini innanhýsis í samgonguni, sambært Bárði Nielsen.
Áhugavert verður tó at síggja, hvør semja kann fáast um eitt tilfeingisgjald. Javnaðarflokkurin hevur síðani valið havt sera ógreiðar og beinleiðis frustrerandi útsagnir um tilfeingisgjald, sum hann fyri valið tók undir við. So vil Fólkaflokkurin ikki, so mugu Tjóðveldi og Framsókn enn einaferð verða álitið hjá sambandsløgmanni.
Men sum áður nevnt, so skyldar Fólkaflokkurin løgmanni nógv. Kanska nóg mikið til at slaka við tilfeingisgjaldinum...
