Í øllum førum halda fakfelagsfólkini, sum sita í stýrinum fyri ALS, at summi fólk – kanska bara stjórar – eru so nógvar ferðir meira verd enn fakfelagslimir og arbeiðsleys, at tey skulu berast á lógvum og hjúklast skal um tey. Sektin á, at hægsta útgjaldið hjá ALS varð lækkað niður í 17.500 krónur um mánaðir, og karensdagar settir í verk.
Ger so væl! 1,2 milliónir krónur!
Tað fær stjórin í Arbeiðsloysisskipanini, nú hann ikki tímdi at vera stjóri meira, tí – sum hann segði á Rás2 mikudagin – »hann ikki tímdi at enda í ALS«.
Men tað kann ikki vera allur sannleikin, sum Alfred Petersen, stýrisformaður, vísti á í gjár.
Tað kann ikki passa, at stýrið fyri ALS – í berum ovfarakæti – samtykkir at taka 1,2 milliónir krónur frá arbeiðsleysum til ein stjóra, sum als ongan rætt hevur til hesar pengar. Alfred Petersen segði tað sjálvur, at treytirnar hjá stjóranum í ALS vóru eftir lógini um stravsmenn. Tað vil siga, at stjórin hevur ein mánað uppsagnartíð – og ikki seks mánaðir, sum advokaturin vildi vera við.
Tað, sum advokaturin helst blandar við, er tá starvsmaður verður uppsagdur. Og tað er rættiliga áhugavert, at formaðurin í stýrinum fyri ALS hugsar um uppsøgn av stjóra. Tað fær okkum at misteinkja hann fyri at dylja veruleikan.
Vit kunnu sjálvandi bara gita, tí vit vita so yvirhøvur ikki, hvørjar uppsagnartreytir stjórin í ALS hevur. Men ofta hava stjórar langar uppsagnarfreistir. Tað gekk sjón fyri søgn við stjórunum í Eik Banka.
Hinvegin kunnu vit bara staðfesta, at stýrið í ALS – við trimum fakfelagsumboðum á odda, Ingeborg Vinther, fyrrverandi forkvinnu í Føroya Arbeiðarafelag, Jan Højgaard, formaður í Føroya Fiskimannafelag, og Kartna Ravnsfjall, varalimur í nevndini í Starvsmannafelagnum, halda, at soleiðis eigur eitt slíkt mál at loysast.
Men vit kundu hugsað okkum at vitað, hví fakfelagið hjá føroyskum arbeiðarum, fakfelagið hjá fiskimonnum og fakfelagið hjá øllum alment settum starvsfólkum í Føroyum halda hetta vera í ordan. Halda limirnir í hesum feløgum virkuliga tað sama, sum teirra umboð?
Men vita bara! Eingin ger nakað. Einki hendir.
Fakfelagspampararnir skovla sínar nevndarlønir inn – og so kunnu limirnir í kór rópa eitt trífalt hurrá fyri síni egnu korruptu skipan, sum tey sjálvi gjalda fyri!
