Skerjingar eru kortini gjørdar seinastu árini, so vit kunnu siga, at tað gongur rætta vegin. Men eins og vit vit hava víst á fyrr, so eru fyrilitini so ymisk. Politikarar skulu velja ímillum leiðina hjá fiskimonnum, har talan kanska er um løtuvinning - ella leiðina hjá fiskifrøðingunum, sum førir til eitt tap í fyrstu syftu. Verður trýstið skert so nógv, sum fiskifrøðingarnir mæla til, ja so fer at svíða fyrstu tíðina, men sambært hesi serfrøði, so fer tað at løna seg aftur í ríkiligt mát, tá stovnarnir koma fyri seg aftur, og vit við einum minni flota kunnu fiska meira og betri fisk.
Men politiska telvingin, sum vit hava verið vitni til seinastu dagarnar ber ikki boð um dygdargott politiskt handverk. Vit sóu tveir sambandsmenn, sum tóku undir við andstøðuuppskotinum undir aðru viðgerð. Hetta fall ikki í góða jørð hjá løgmanni, sum skírdi Edmund Joensen og Magna Laksafoss populistar.
Við triðju viðgerð í gjár lupu enn fleiri samgongupolitikarar frá og nærkaðust andstøðuni. Uppskot teirra um at skerja fiskidagarnar við átta prosentum kundi verði samtykt - og soleiðis kundi samgongan komið í vanda. Tað ljóðaði úr tinginum, at Fólkaflokkurin hevði sett hetta málið sum eitt kardinalpunkt - um málið ikki varð samtykt, so var eingin samgonga, segði onkur fólkafloksmaður í gongini í løgtinginum.
Tað var í hesum stríði í 2008, at Høgni Hoydal, formaður í Tjóðveldi boðaði frá, at um flokkur hansara ikki megnaði at standa saman í hesum máli, so var Tjóðveldi ikki ein stjórnarberandi flokkur. Hetta megnaði Tjóðveldi ikki - og fáar vikur seinni varð hann koyrdur á dyr úr Tinganesi.
Hesaferð megnaði Tjóðveldi heldur ikki at standa saman sum ein flokkur. Heini O. Heinesen atkvøddi ikki saman við floksfeløgum sínum, og tað var beinleiðis orsøkin til, at broytta uppskotið hjá Jacob Vestergaard varð samtykt.
Tað er ein marghátlig støða: Samgongan hevur ikki meiriluta í tinginum, men av tí at andstøðan ikki stendur saman - og av tí at tingmanningin hjá Tjóðveldi ikki dregur eina línu, so kann samgongan halda fram við at sigla millum ósamdu skerini í andstøðuni.
