Tað var longu greitt valkvøldið, at nýggja tingmanningin hjá Javnaðarflokkinum ikki á nakran hátt kundi vera stjórnarberandi. Løgmaður segði beinleiðis, at hann kundi ikki samstarva við Javnaðarflokkin, eftir at fleiri vargar vóru millum løgtingslimirnar.
Millum manna var tað eisini greitt, at Javnaðarflokkurin ongan kjans hevði við hesi hesi tingmanningini, og tí var yvirskriftin á hesum teigi í fyrsta blaðnum eftir valið púra greið: »Stakkals Aksel«.
Hesa yvirskrift komu vit til, tí vit mettu, at Aksel V. Johannesen fór at fáa sína sak fyri við nýggju tingmanningini:
– Øll vita, at Gerhard Lognberg hevur ligið í støðugum stríði við floksleiðsluna. Henrik Old hevur beinleiðis arbeitt ímóti leiðsluni og flokkinum í valstríðnum, og Kristin Michelsen á Tvøroyri er ikki júst kendur fyri at vera serliga kompromisøkjandi, skrivaði Sosialurin í oddagreinini.
At flokkurin fór at taka hesa støðuna so álvarsamt, at tað fór at enda við eini útblaking, høvdu fólk neyvan roknað við. Tí slíkt plagar ikki at fáa avleiðingar í politiskum flokkum í Føroyum. Har velja vit heldur at siga, at »hatta er bara Gerhard«, ella »hatta er bara Óli«, ella »hatta er bara tobbi«. Og so koyrir sirkusið víðari.
Javnaðarflokkurin hevur nú gjørt bart og tveitt Gerhard Lognberg á dyr.
Kristin Michelsen dyrgir nú eftir at koma í onkra martýrstøðu við eisini at verða tveittur út. Hann var í seinastu uppgerð tann tingmaður, sum hevur møtt ringast upp í løgtinginum. Hann er hægst lønti politikarin í Føroyum við løgtingsløn og borgarstjóraløn upp á umleið 90.000 kr um mánaðin. Hann er kendur fyri sjáldan at taka orðið á tingi og mangan at fara suður við Smyrli, áðrenn atkvøtt verður.
Kristin Michelsen møtti ikki á floksleiðslufundinum leygardagin, har hann kundi gjørt sína ávirkan galdandi.
Men álvaratos, hvat er problemið Kristin Michelsen? Um tú heldur ikki kennir teg heima í hasum flokkinum, so er bara at fara heldur enn at troytta Føroya fólk við hasum glantrileikinum, sum í besta føri skapar stikni fyri politikki.
