Eyðvitað eru fleiri tingfólk, sum hava sína greiðu meining um hesi viðurskifti. Nøkur tvíhalda um, at hjúnabandið er millum mann og kvinnu, tí soleiðis hevur tað altíð verið, og tí at tað stendur í Halgubók.
Onnur eru sannførd um, at øll eiga rættin til at liva saman við tí, sum tey sjálvi hava hug til, um tað so er við fólki av sama kyni.
Løgmaður er sjálvur fyri, at samkynd fólk eiga at sleppa at giftast. Og tað eru tey í ungmannafelagnum hjá Sambandsflokkinum eisini. Onnur tingfólk í flokkium eru eisini fyri.
Men fyri at fáa frið í samgonguni, so hevur Kaj Leo Holm Johannesen gjørt avtalu um, at øll samgongan skal standa saman um at fella uppskotið, sum Bjørt Samuelsen, Rigmor Dam og Poul Michelsen hava lagt fyri tingið.
Hóast Miðflokkurin nú er marginaliseraður í samgonguni – tørvur er ikki á teirra atkvøðum, so tykist flokkurin megna at halda allari samgonguni fast upp á grundsjónarmiðini hjá flokkinum um, at hjúnabandið einans er millum mann og kvinnu. Hetta hóvar eisini væl Fólkaflokkinum, tí fleiri av tingfólkum floksins hava somu støðu.
Hetta merkir so eisini, at at Janus Rein má svíkja sítt vallyfti um, at samkynd skulu sleppa at giftast. Janus Rein og Poul Michelsen eru teir einastu, sum eru valdir upp á at loyva samkyndum at giftast. Í so máta hevur Janus Rein svikið sínar veljarar, meðan Poul Michelsen heldur sítt lyfti – lyfti frá einasta flokki, sum hevur hjúnalag millum samkynd í stevnuskránni.
Vit kunnu kanska freistast til at finnast at løgmanni fyri at hava gjørt eina avtalu um, at minnilutin í samgonguni hevur valdið.
Men hetta er einki eindømi. Somu avtalu hevur Høgni Hoydal eisini gjørt, tá hann sat í samgongu. Tað var tá málið um viðgitnu grein 266b var fyri fyrru ferð. Tá mátti Høgni Hoydal og Tjóðveldi eisini boyggja seg fyri sjónarmiðunum hjá Miðflokkinum.
Harfyri er tað ikki rætt, at løgmaður bindur allar samgonguna á hendan hátt. Men tey, sum eru fyri hesum uppskoti, kunnu bara bíða í tolni. Hetta er eitt mál, sum skjótt fer at verða samtykt – eisini við atkvøðum úr bæði Sambandsflokkinum og Fólkaflokkinum. Tíðin stendur jú ikki í stað, hóast ávísar kreftir berjast ímóti...
