Tað segði Aksel V. Johannesen, formaður Javnaðarfloksins við in.fo um vikuskiftið.
Orsøkin til spurningin var, at Jørgen Niclasen hevði stevnt tingfólki til fundar mánadagin um tunnilsmálið, ein fundur, sum varð útsettur vegna verður, og sum ikki er liðugur nú í skrivandi stund.
Nógv er, sum bendir á, at ein semja er komin undir land. Ein semja, sum bæði andstøða og samgonga kunnu liva við.
Eftir at Kári P. Højgaard koyrdi alt málið um Skálafjarðatunnilin fast, tí hann saman við løgmanni vildi trýsta málið ígjøgnum løgtingið, tykist nú, at naggatódnin er við at rekjast upp.
Og nú er tað Jørgen Niclasen, fíggjarmálaráðharri og formaður Fólkafloksins, sum er eksponenturin fyri eini tunnilssemju millum allar partar – helst eisini Kári P. Højgaard.
Tað er tann sonevndi Suðurbólkurin og floksformenninir, sum hava fundast um tunnilsloysn, og tað verða eisini teir, sum nú fundast.
Sambært somu samrøðu við Aksel V. Johannesen á in.fo, so væntar hann at semja verður gjørd.
Men so er spurningurin, um Javnaðarflokkurin kann gera slíka semju við Fólkaflokkin – har tað er Fólkaflokkurin, sum stingur politikkin út í kortið.
Men tað kann Javnaðarflokkurin sambært Aksel V. Johannesen. Boykottið hjá Javnaðarflokkinum mótvegis Fólkaflokkinum snýr seg bara um at fara í samgongu.
Hesir báðir flokkar hava samstarvað í fimm samgongum. Tann fyrsta var frá 1975-79, tann næsta frá 1979-81, tann triða frá 1991-93, tann fjórða frá 2004-08 og tann fimta frá 2008-11.
Javnaðarflokkurin hevur mist atkvøður á hvørjum vali eftir samstarv við Fólkaflokkin. Á valinum í 1978 stóð tingmannatalið tó í stað, í 1980 misti flokkurin ein tingmann, í 1994 misti hann fimm tingfólk, í 2008 stóð tingmannatalið í stað, og í 2011 misti flokkurin ein tingmann.
Tiltakið hjá Aksel V. Johannesen er kanska fyrsta byrjanin til eitt slag av blokkpolitikki, har tú frammanundan veitst, at atkvøður tú fyri Aksel fært tú ikki Jørgen. Hetta er ikki eitt kent fyribrigdi í føroyskum politikki – og eitt slíkt stig forðar so eftir øllum at døma ikki fyri breiðum semjum á Føroya Løgtingi fyri týdningarmiklum málum.
