Vit kunnu bara taka undir við Tórshavnar kommunu og Heðini Mortensen, borgarstjóra, í kravinum um, at SEV skal hyggja í seg sjálvt. Tað er margháttligt, at ein vinnufyritøka sum SEV ikki aktar boðini frá eigaranum um at koma við eini nýggjari ætlan – tá eigarin á aðalfundi vrakar ta ætlan, sum leiðslan er komin við. Bara at koma við somu ætlan einaferð enn vísir eina totala arrogansu. Tað er eftir øllum at døma ikki eigarin, sum ræður í SEV, men í alt ov stóran mun nevnd og leiðsla.
Hetta er eisini eitt dømi um, hvussu illa tað kann ganga, tá politikarar skulu fáast við vinnu. Teir eru vanir at leggja skattir og avgjøld á fólk. Teir hava eftir øllum at døma ikki tað jørðforbindilsið, sum skal til fyri at duga at skilja, at ein vinnufyritøku bæði hevur eina inntøkusíðu og serliga eina útreiðslusíðu, sum kann regulerast. Tað ber til at reka eina vinnufyritøku bíligari. Tak Føroya Tele, tak Posta - almennar fyritøkur, sum eru lagdar í partafeløg.
Hesar fyritøkur og aðrar við hava sagt fólki upp og útsett ella avlýst út- og umbyggingar. Aðrar fyritøkur við hava umlagt lán og gjørt reguleringar fyri at kunna reka virksemið bíligari og við færri fólkum. Hví kann SEV ikki gera tað?
El-prísurin hevur so stóra ávirkan á alt samfelagið, at hetta kann berast saman við eina stóra skattahækking hjá bæði vinnuni og privatfólki. Hetta rakar alt samfelagið so sera meint. Tí hvílir ein stór ábyrgd á hesum lokalpolitikarum, sum hava tikið hesa avgerð. Og so hava teir eisini lovað okkum somu jólagávu næstu tvey jólini!
Tað eru jú vit øll - brúkararnir - sum eiga SEV. Vit ynskja okkum, at hesin hesin tungi almenni monopolstovnurin reisist og vísir vilja í verki. Latið tildømis onnur sleppa at framleiða streym á netið hjá SEV - sum enntá vilja gera tað bíligari. Vísið í verki, at tit veruliga vilja geva stovninum ta kapping, sum skal til fyri at tryggja effektivitet og framburð.
Vit ynskja okkum ikki óneyðugur hækkingar. Og skal talan verða um hækking, so er ikki at taka so rívan til men vísa varsemi, eins og við sáttmálanum sum kommunarnar júst hava gjørt við alment sett starvsfólk.
Og so ynskja vit øllum eini gleðilig jól!
