Hetta sigur forsætismálaráðharrin, tí at løgfrøðingar í løgmálaráðnum danska hava tulkað uppskotið frá stjórnarskipanarnevndini soleiðis, at føroyingar vilja hava loysing inn gjøgnum bakdyrnar.
Tað var í 1906, at vit fingu floksbýtið á tingi. Og floksbýtið gekk bara út upp á at bólka tingmenn fyri ella ímóti Danmark: Sambandsmenn og Sjálvstýrismenn. Ein rættiliga heimføðisligur háttur at dríva politikk uppá, kunnu vit siga. Og somuleiðis mugu vit við skomm siga, at vit eru ikki komin serliga nógv longur í so máta enn.
Á sama hátt sum Andrass Samuelsen og Jóannes Patursson stríddust, stríðast vit framvegis um ríkisrættarligu støðu Føroya. Kortini eru vit kanska ikki so ósamd kortini, tí við uppskotinum frá stjórnarskipanarnevndin hómast ein semja, eitt konsensus millum føroyskar politikarar um, hvussu vit skulu definera okkum sum land og sum tjóð - uttan at hetta skal vera eitt uppskot um at loysa Føroyar úr ríkisfelagsskapinum við Danmark. Tað blíðkar fyri hugaðum monnum.
Tí er tað so stórt spell, at tað ikki eisini skal blíðka fyri hugaðum dønum. Tað er stórt spell, at forsætismálaráðharrin - sum betur enn nakar annar danskur politikari eigur at skilja føroyskan politikk - eisini skal fella í hesa grøvina, sum sjálvt skilagóð og pragmatiskt fólk á bæði sambands og tjóðveldisveinginum skilja: At tað er neyðugt at fáa eina tvørpolitiska semju um stjórnarskipan okkara og eina semju um, hvussu vit skipa okkum sum tjóð, bæði innan fyri danska ríkið og uttanfyri - um vit einaferð skuldu valt tað.
At billa sær inn, at Føroya Løgting ætlar at sníka eina loysing inn gjøgnum bakdyrnar við hesum uppskotinum er simpulthen ov býtt. Tað er ikki klókt av forsætisráðharranum at siga slíkt.
Um tað er nakað, sum føroyingar eru so nøkulunda samdir um, so er tað, at vit ikki vilja hava loysing. Um føroyingar vildu havt loysing, so høvdu loysingarflokkarnir havt meirilutan á tingi.
Stundin er komin til at gevast við hesum stríði, sum fyllir alt ov nógv í politisku skipanini. Tí er ein semja um stjórnarskipanina kærkomin, og kann politiska skipanin konsentrera seg um at reka politikk, so er nógv vunnið.
