Við FM1 á middegi í gjár segði Bárður Nielsen, at um tað kann vera neyðugt hjá honum at fara at tosa við løgtingsformannin um, hvussu farast skal fram tí tað stóð í botni í stríðnum um málsøkjabýtið millum flokkarnar.
Tað er einki óvanligt, at tað leikar hart á í samgongusamráðingum, og tí er væl hugsandi, at hesin knúturin loysnar – og kanska er loysnaður, tá tú situr við hesum blað.
Men hinvegin er tað sum vera man av alstórum týdningi hjá eitt nú Fólkaflokkinum at fáa tey tungu málsøkini, um flokkurin má boyggja seg fyri, at hinir flokkarnir ikki góðtaka formann floksins, Jørgen Niclasen, sum løgmann.
Tá Fólkaflokkurin vann valið upp á fiskivinnupolitikkin, so sigur tað seg sjálvt, at flokkurin tekur fiskivinnumálini á seg. Uttan løgmann skal Fólkaflokkurin jú hava í minsta lagi fýra landsstýrissessir – harav fiskivinnumálini eru tey, ið viga mest, harnæst fíggjarmálini, sum flokkurin uttan iva eisini krevur.
Sambandsflokkurin og Fólkaflokkurin eru eftir øllum at døma enn ikki komnir ásamt um fiskivinnupolitikkin í samgonguskjalinum. Og tað smakkar sera illa hjá Sambandsflokkin at lata Fólkaflokkinum fiskivinnumálini at umsita – tí øll í flokkinum vita, at trýstið frá Fólkaflokkinum verður so stórt, at flokkurin megnar ikki at standa ímóti
Bárður Nielsen hevur ráð at lata tíðina ganga. Hann hevur eisini ráð at fara til løgtingsformannin enn einaferð – fyri at royna eina aðra samgongu.
Støðan hjá Bárði Nielsen er so góð, at hann hevur ráð at fara undir samráðingar við sitandi samgonguflokkur at vita, um Sambandsflokkurin fær meira burturúr har – fyri síðani at venda aftur til Fólkaflokkin og Miðflokkin, sum tað nú var frægari.
Sjáldan stendur ein politiskur flokkur í so sterkari samráðingarstøðu, sum Sambandsflokkurin ger nú. Sitandi samgonga hevði uttan iva givið Sambandsflokkinum fiskivinnumál.
